اسلام آباد (ويب ڊيسڪ) نائب وزيراعظم ۽ پرڏيهي وزير اسحاق ڊار تصديق ڪئي آهي ته جماعت اسلامي جي اڳوڻي سينيٽر مشتاق احمد کي اسرائيلي قيد مان آزاد ڪيو ويو آهي.
سماجي رابطن جي ويب سائيٽ ايڪستي جاري هڪ بيان ۾ اسحاق ڊار اڳوڻي سينيٽر جي آزادي جي تصديق ڪندي لکيو ته ”مون کي اهو ٻڌائيندي خوشي ٿي رهي آهي ته اڳوڻي سينيٽر مشتاق احمد کي آزاد ڪيو ويو آهي.“
پرڏيهي وزير چيو ته ”هو هن وقت عمان ۾ پاڪستاني سفارتخاني ۾ موجود آهي، جتي کيس مڪمل سهولت ۽ مدد فراهم ڪئي پئي وڃي ۽ وطن واپسي لاءِ انتظام ڪيا پيا وڃن.“
اسحاق ڊار پنهنجي پوسٽ ۾ وڌيڪ چيو ته ”مان انهن هڙني دوست ملڪن جو ٿورائتو آهيان جن ان معاملي ۾ فعال ڪردار ادا ڪيو ۽ پاڪستان جي پرڏيهي کاتي سان سهڪار ڪيو.“
واضح رهي ته 2 آڪٽوبر تي ”گلوبل صمود فلوٽيلا“ ۾ شامل ٻيڙين تي 500 کان وڌيڪ ماڻهو سوار هئا، جن کي اسرائيلي فورسز گرفتار ڪري ورتو هو.
فلوٽيلا ۾ اطالوي سياستدان ۽ سوئيڊن جي ماحولياتي ڪارڪن گريٽا ٿنبرگ سميت پاڪستان جو اڳوڻو سينيٽر مشتاق احمد خان ۽ هڪ ٻيو پاڪستاني شهري سيد عذير نظامي پڻ شامل هو.
سينيٽر مشتاق احمد پنهنجي ايڪس اڪائونٽ تان جاري ڪيل وڊيو پيغام ۾ چيو ته ”مان پنهنجي 150 ساٿين سان گڏ هاڻي اردن پهچي چڪو آهيان، پنج کان ڇهه ڏينهن اسرائيلي جيل ۾ رهڻ کان پوءِ اسان کي آزادي ملي آهي.“
هن چيو ته ”اسرائيلي جيل ۾ اسان کي بدترين تشدد جو نشانو بڻايو ويو، اسان جي هٿن ۾ هٿڪڙيون، پيرن ۾ ٻيڙيون ۽ زنجيرون وڌيون ويون، اکيون ٻڌيون ويون ۽ اسان تي بندوقون تاڻيون ويون.“
مشتاق احمد جو وڌيڪ چوڻ هو ته ”اسان پنهنجي مطالبن لاءِ ٽن ڏينهن تائين بک هڙتال ڪئي، پر اسان کي پيئڻ لاءِ پاڻي، هوا ۽ طبي سهولتن کان محروم رکيو ويو، ايتري حد تائين جو اسان کي ڪنهن به شيءِ تائين رسائي نه ڏني وئي.“
