ميلبورن (ويب ڊيسڪ) ڪرڪيٽ آسٽريليا جي سي اي او ٽوڊ گرينبرگ اميد ظاهر ڪئي آهي ته پاڪستاني ڪرڪيٽرز کي هن سال به بيگ بيش ليگ (بي بي ايل) ۾ کيڏڻ جو موقعو ملندو.
ٽوڊ گرينبرگ پي سي بي طرفان رانديگرن جي اين او سي روڪڻ تي پنهنجي بيان ۾ چيو ته هن پاڪستان ڪرڪيٽ بورڊ سان رانديگرن جي اين او سي روڪڻ واري فيصلي تي ڳالهايو آهي.
هن چيو ته گذريل ڪجهه ڏينهن کان پي سي بي سان رابطي ۾ آهيون، اميد آهي ته اسان ڪو حل ڪڍي وٺنداسين ۽ بي بي ايل جو هي شاندار سيزن ثابت ٿيندو.
ٽوڊ گرينبرگ چيو ته اسان رانديگرن کي بيگ بيش ليگ ۾ ڀليڪار چوڻ جا منتظر آهيون، اسان کي پَڪ آهي ته پاڪستاني رانديگر بي بي ايل جي ويليو ۾ واڌارو ڪندا.
واضح رهي ته ڪجهه ڏينهن اڳ پي سي بي پنهنجن رانديگرن جا پرڏيهي ليگز لاءِ اين او سي هولڊ ڪري ڇڏيا هئا.
ان ڏس ۾ ذريعن جو چوڻ آهي ته پي سي بي اين او سي انهن ئي رانديگرن کي ڏيندو جيڪي بين الاقوامي ۽ ڊوميسٽڪ ڪرڪيٽ ۾ ڪارڪردگي جي معيار تي پورا لهندا.
پاڪستان جي طرفان بابر اعظم، شاهين آفريدي، حارث رئوف ۽ شاداب خان سميت 7 پاڪستاني بي بي ايل جو حصو آهن ۽ بِگ بيش ليگ جا مقابلا ڊسمبر کان شروع ٿيندا.
