واشنگٽن(ويب ڊيسڪ) آمريڪا دفاعي ڪمپنين کي هدايت ڪئي آهي ته هو ميزائيلن ۽ ٻين اهم هٿيارن جي پيداوار 2 کان 4 ڀيرا تائين وڌائن، جيئن چين سان امڪاني تڪرار جي صورت ۾ هٿيارن جي کوٽ کان بچي سگهجي.
وال اسٽريٽ جرنل جي رپورٽ موجب، پينٽاگون آمريڪي هٿيارن جي گهٽ اسٽاڪ تي پريشان آهي ۽ انڪري پنهنجن ميزائيل فراهم ڪندڙن تي زور ڏئي رهيو آهي ته هو تيز رفتاري واري شيڊيول تحت پيداوار وڌائن.
ان حوالي سان پينٽاگون جي اعلى اختيارين ۽ آمريڪين ميزائيل ساز ڪمپنين جي نمائندن جي وچ ۾ ڪيئي اعلى سطحي اجلاس ٿي چڪا آهن،
ذريعن جو چوڻ آهي ته ڊپٽي ڊفينس سيڪريٽري اسٽيو فينبرگ ان عمل جي سڌي ريت نگراني ڪري رهيو آهي ۽ هفتيوار بنيادن تي ڪمپنين جي سربراهن سان رابطي ۾ رهي ٿو.
جون ۾ پينٽاگون اهم ميزائيل ساز ڪمپنين کي هڪ اجلاس لاءِ طلب ڪيو هو جنهن ۾ آمريڪي بچاءَ واري وزير پيٽ هيگسٿ ۽ چيئرمين جوائنٽ چيفس آف اسٽاف جنرل ڊين ڪين به شرڪت ڪئي، انهيءَ اجلاس دوران لاڪ هيڊ مارٽن، ريٿيون، اينڊريل انڊسٽريز ۽ ٻين ڪمپنين جي نمائندن به شرڪت ڪئي هئي.
انهن ادارن چيو آهي ته اهي وڌيڪ ملازم ڀرتي ڪري رهيا آهن، ڪارخانن جي توسيع ڪري رهيا آهن ۽ واڌو پرزن جو اسٽاڪ تيار ڪري رهيا آهن ته جيئن ممڪن طلب کي پورو ڪري سگهجي.
اخبار موجب، جون ۾ ٽرمپ انتظاميا وڌيڪ جارحاڻي پيداوار جا هدف مقرر ڪيا هئا، انهي عرصي دوران اسرائيل ۽ ايران جي وچ ۾ 12 ڏينهن واري جنگ ۾ آمريڪا سوين جديد ميزائيل استعمال ڪيا جهڙوڪ جنهن سبب آمريڪي اسٽاڪ وڌيڪ گهٽجي ويا.
ذريعن موجب، پينٽاگون چين سان امڪاني جنگ لاءِ 12 هٿيارن کي ترجيح ڏئي رهيو آهي، جن ۾ پيٽرياٽ انٽرسپٽر ميزائيل، لانگ رينج اينٽي شپ ميزائل، اسٽينڊرڊ ميزائيل 6، پريسيجن اسٽرائڪ ميزائيل ۽ جوائنٽ ائير-سرفيس اسٽينڊ آف ميزائيل شامل آهن.
خاص طور تي پيٽرياٽ ميزائيل کي پهرين ترجيح ڏني پئي وڃي ڇو ته لاڪ هيڊ مارٽن عالمي طلب کي پورو ڪرڻ ۾ ناڪام رهي آهي.
دستاويزن موجب پينٽاگون ڪمپنين کي چيو آهي ته اهي 6، 18 ۽ 24 مهينن جي اندر پيداوار کي موجوده سطح کان 2.5 ڀيرا وڌيڪ ڪرڻ جو منصوبو پيش ڪن.
سيپٽمبر ۾ آمريڪي فوج لاڪ هيڊ مارٽن کي لڳ ڀڳ 10 ارب ڊالر جو ٺيڪو ڏنو، جنهن تحت اها ڪمپني 2024 کان 2026 جي وچ ڌاران اٽڪل 2 هزار پي اي سي-3 ميزائيل تيار ڪندي، پينٽاگون چاهي ٿو ته مستقبل ۾ هر سال اهڙا ئي پيٽرياٽ ميزائيل ٺاھيا وڃن جيڪي موجوده پيداوار کان لڳ ڀڳ چار ڀيرا وڌيڪ هجن.
