حيدرآباد (پ ر) عوامي تحريڪ جي مرڪزي صدر ايڊووڪيٽ وسند ٿري، مرڪزي جنرل سيڪريٽري ايڊووڪيٽ ساجد حسين مهيسر، مرڪزي نائب صدر ستار رند، مرڪزي اڳواڻ عبدالقادر رانٽو، نور نبي پليجو ۽ ايڊووڪيٽ آصف کوسي پنهنجي گڏيل پريس بيان ۾ چيو آهي ته حڪمران پنهنجي نااهليءَ، ڪرپشن ۽ قبضن کي لڪائڻ لاءِ ڊيمن جي حمايت ۾ مهم هلائي رهيا آهن. دريائي وهڪرن تي قبضن پنجاب ۾ موجوده تباهي آندي آهي. اڳواڻن چيو ته پنجاب سرڪار طرفان ڊيمن جي حمايت جي مهم ڪوڙ ۽ فراڊ تي ٻڌل آهي، ڪو به ماحولياتي ۽ پاڻي ماهر ڊيمن جي حمايت نٿو ڪري، سائنسي طور ڊيم عوام دشمن آهن پر پنجاب سرڪار ڊيم مافيا جي مفادن کي تحفظ فراهم ڪرڻ لاءِ ڊيمن جي حمايت ۾ مهم هلائي ملڪ دشمني ڪري رهي آهي. اڳواڻن وڌيڪ چيو ته سمنڊ ۾ پاڻي ضايع ٿيڻ جون خبرون عوام کي ڌوکي ۾ رکڻ جي سازش آهن، علي امين گنڊاپور طرفان ڪالاباغ ڊيم جي حمايت ۾ ڏنل بيان جي مذمت ڪندي عوامي تحريڪ جي اڳواڻن چيو ته علي امين گنڊاپور تڪراري بيان ڏئي ملڪ دشمن قوتن جي ترجماني ڪئي آهي.
