ڪراچي ( ويب ڊيسڪ) سنڌ حڪومت غير رجسٽرڊ گاڏين کي روڊن تي آڻڻ تي پابندي لاڳو ڪري ڇڏي.
ڪراچي ۾ پريس ڪانفرنس ڪندي سينيئر صوبائي وزير شرجيل انعام ميمن چيو ته عوام شڪايتون ڪندا آهن ته ايڪسائيز ڊپارٽمينٽ نمبر پليٽون جاري نٿو ڪري، جڏهن ته 80 هزار نمبر پليٽون موجود آهن، جيڪي ماڻهن وصول نه ڪيون آهن.
هن ٻڌايو ته واٽر بورڊ طرفان واٽر ٽينڪرن کي بار ڪوڊ جاري ڪيا ويا آهن، جنهن سان گاڏين جي فٽنيس چيڪ ٿي سگهندي ۽ جيڪي واٽر ٽينڪر رجسٽرڊ نه هوندا، انهن کي روڪيو ويندو.
شرجيل ميمن جو چوڻ هو ته هيوي ٽريفڪ لاءِ فٽنيس سرٽيفڪيٽ لازمي هوندو، پر انهن کي وقت ڏنو ويو آهي، ٻين صوبن مان ايندڙ هيوي گاڏين لاءِ به سنڌ جو فٽنيس سرٽيفڪيٽ ضروري هوندو.
هن چيو ته ڊمپرز بابت نون قاعدن مطابق هاڻي شهر ۾ ڊمپر رات 10 وڳي کان صبح 6 وڳي تائين هلائي سگهبا.
صوبائي وزير خبردار ڪيو ته قانون موجب ڪو به شو روم غير رجسٽرڊ گاڏي وڪرو نٿو ڪري سگهي، سومر تائين جيڪڏهن ڪو به غير رجسٽرڊ گاڏي شو روم کان ٻاهر نڪتي ته شو روم سيل ڪيو ويندو ۽ گاڏي ضبط ڪئي ويندي.
واضح رهي ته ڪراچي ۾ تازو ئي ٽريفڪ حادثن ۾ اضافو ٿيو آهي، جنهن ۾ ڊمپرز ۽ واٽر ٽينڪرن جي ٽڪر سان ڪيترائي شهري فوت ٿي چڪا آهن.
