حيدرآباد(رپورٽر) سنڌ جي وڪيلن، گرين پاڪستان انيشيٽو ۽ ايس آءِ ايف سي جي منصوبن تحت سنڌو درياهه مان 6 نوان ڪئنال ڪڍڻ ۽ زمينون خانگي ڪمپنين ۽ ادارن حوالي ڪرڻ وارن فيصلن کي رد ڪندي ڪئنالن جي اڏاوت خلاف ڀرپور جدوجهد جو اعلان ڪيو آهي. ڪالهه حيدرآباد هاءِ ڪورٽ بار ۽ وڪيلن جي جوڙيل سنڌ لائيرز اينٽي ڪئنالز ايڪشن ڪميٽي جي ميزباني ۾ حيدرآباد ۽ ميرپورخاص هاءِ ڪورٽ بار ۽ انهن جي 13 ضلعي بار ايسوسيئيشنز جي سنڌو درياهه بابت گڏيل ڪانفرنس منعقد ٿي. هاءِ ڪورٽ بار ۾ ٿيل هن ڪانفرنس ۾ هر بار جي صدر ۽ جنرل سيڪريٽري شرڪت ڪئي. ڪانفرنس ۾ فيصلو ڪيو ويو ته ايندڙ هفتي هڪ ڏينهن مقرر ڪري عدالتن جي ڪاروهنوار جو بائيڪاٽ ڪري وڪيل بارز کان جلوس ڪڍي پريس ڪلبن آڏو مظاهرا ڪري ڪئنالن خلاف احتجاج رڪارڊ ڪرائيندا. ان احتجاج کانپوءِ حيدرآباد ۾ ڊويزن سطح جي احتجاج جو به فيصلو ڪيو ويو. وڪيلن طئي ڪيو آهي ته هڪ عالمي سطح جي پاڻي ڪانفرنس ڪوٺائي ان ۾ دريائن جي پوڇڙين ۾ رهندڙ ماڻهن جي حقن جي قانون کي اجاگر ڪيو ويندو. ڪانفرنس ۾ پاڻي سان لاڳاپيل ماهرن سنڌو درياھه تي ڪئنالن جي اڏاوت سان سنڌ تي پوندڙ اثرن بابت بريفنگ ڏني. ان موقعي تي سنڌ هاءِ ڪورٽ بار ايسوسيئيشن جي صدر اياز حسين تنيو خطاب ڪندي چيو ته سنڌ هاءِ ڪورٽ بار اڳواڻي ڪري رهي آهي، سنڌو درياهه جي پاڻي تي ڪا به سوديبازي قبول ناهي، جيڪڏھن وفاق پنھنجي ھوڏ تان نه لٿو ته سڄي سنڌ ۾ وڪيل روڊن رستن تي ھوندا. هن چيو ته ڪجهه بااثر شخصيتن جي لکين ايڪڙ زمين آباد ڪرڻ لاءِ سنڌ جي غريب هارين جي زمين کي بنجر ڪرڻ لاءِ 6 ڪئنالن وارو منصوبو جوڙيو پيو وڃي، جنهن کي سنڌ جو عوام ڪڏهن به برداشت نه ڪندو. اياز تنيو ٻڌايو ته سنڌ هاءِ ڪورٽ بار حيدرآباد ۾ هڪ وڏو اجتماع ڪرڻ واري آهي، جنهن ۾ سنڌ جون بارز ۽ وڪيل برادري وڏي انگ ۾ شرڪت ڪري 6 ڪئنالن واري منصوبي خلاف پنهنجو ڀرپور احتجاج رڪارڊ ڪرائيندي، ڪانفرنس ۾ عرفان ٻگھيو چيو ته اسان کي تاريخ ٻڌائڻ جي ضرورت ناهي ته 1901ع ۽ 1906ع ۾ سنڌو درياهه جي پاڻي سان ڇا ٿيو،سنڌ لائيرز اينٽي ڪئنالز ايڪشن ڪميٽي جي ڪنوينئر ايڊووڪيٽ مير احمد مڱريو چيو ته ڪانفرنس ۾ ملڪ جي صدر پاران گرين پاڪستان انيشيٽو جي نالي تي سنڌو درياهه مان ڪئنال ڪڍڻ جي اجازت ڏيڻ واري عمل کي رد ڪيو ويو آهي. جڏهن ته قراردادون پيش ڪيون جن کي ڪانفرنس ۾ شريڪ ٿيندڙ وڪيلن هٿ کڻي منظور ڪيو،ڪانفرنس ۾ سينيئر قومپرست اڳواڻ ۽ وڪيل حسين بخش ٿيٻو، امير آزاد پنهور،حاڪم صديقي،فضل جمالي مير فتح احمد، ڪريم بخش ٿيٻو، فهيم انڙ، حڪيم چانڊيو، بادل ڳاهوٽي ۽ ٻين خطاب ڪيو.
