سنڌ ۾ ھونئن ته کوڙ ساريون برايون ۽ مافيائون آھن پر انھن سماجي براين ۾ جيڪا خطرناڪ برائي آهي اھا منشيات جي آھي، جنهن ۾ گذريل ڪجهه سالن کان وٺي اضافو ڏسڻ ۾ آيو آھي، ان کي ڳجهه ڳوھ ۾ ھٿي وٺرائڻ واري ھڪڙي مافيا آھي، جنھن سنڌ جي نوجوان نسل کي ھٿ وٺي تباھيءَ جي ڪناري تي پھچائي ڇڏيو آھي.
منشيات جي وڪري کي روڪڻ ۽ ختم ڪرڻ لاءِ قانون ڪندڙ ادارا جيڪي منشيات فروشن کي چڱي طرح سڃاڻندا آھن، انھن ۾ سڀ کان اول منشيات خلاف جوڙيل نارڪوٽيڪس ايجنسي، ڪسٽم، ايڪسائيز ۽ ٻيا ادارا شامل آھن، جن جي ذميواري ھجي ٿي ته ھو منشيات جو خاتمو آڻين. پر ان جي روڪڻ ۾ حد جي پوليس سڀ کان وڏي رڪاوٽ بڻيل ھوندي آھي، جنھن تي ذميداري عائد ھجي ٿي ته ھوءَ پنھنجي لاڳاپيل ٻين ادارن جي سڌي يا اڻ سڌي طرح مدد ڪن.
سنڌ جي ننڍي وڏي شھر ۾ ڪچو پڪو شراب کير جيان وڪرو ٿيندي پيو نظر ايندو، چرس ڀنگ ھيروئن آفيم به ڪنهن عام وکر جيان پيو وڪرو ٿيندي نظر ايندو اهڙي ئي صورتحال ٽنڊوالھيار ضلعي جي به آهي جتي منشيات جي وڪري ۽ ان سان لاڳاپيل بدعنواني هڪ سنگين سماجي مسئلو بڻجي چڪي آهي. پوليس جي سرپرستي ۾ منشيات جا اڏا هلڻ جا الزام نه رڳو پوليس جي ڪارڪردگي تي سوال اٿارين ٿا پر انهن سماج لاءِ به شديد نقصانڪار اثر پيدا ڪيا آهن.
ٽنڊوالهيار ضلعو، جيڪو زرعي ۽ ثقافتي حوالي سان سڃاتو وڃي ٿو، هاڻي منشيات جي واپار لاءِ بدنام ٿي رهيو آهي. رپورٽن مطابق منشيات جا اڏا پوليس آفيسرن جي سرپرستي ۾ هلن ٿا. هن ڌنڌي ۾ پوليس آفيسرن جي مبينا حصيداري ۽ منٿلين جا تفصيل معاشري ۾ بي اعتمادي پيدا ڪري رهيا آهن.
تازو ٽنڊوالهيار پوليس ۽ منشيات فروشن جا وڊيو ۽ آڊيو ڪالز ليڪ ٿيون آھن جنهن مان ثابت ٿيو آھي ته پوليس سموري ضلعي منجھان منشيات جي وڪري لاءِ مخصوص علائقن ۾ فڪس منٿلي وٺي ٿي، جنهن جو مطلب آهي ته منشيات جا واپاري پوليس کي رشوت ڏين ٿا ته جيئن انهن خلاف ڪارروائي نه ٿئي.
سوشل ميڊيا تي وائرل ٿيل ويڊيوز، جن ۾ ايس ايڇ اوز ۽ ٻين پوليس آفيسرن کي رشوت وٺندي ڏيکاريو ويو آهي، انهن الزامن کي وڌيڪ وزن ڏنو آهي.اها دعويٰ ڪئي وڃي ٿي ته ٽنڊوالهيار جي ڪجهه پوليس آفيسرن ۽ انهن جي عزيز پاڻ به منشيات جي ڪاروبار ۾ شامل آهن. اهي منشيات جا اڏا نه رڳو نوجوانن جي زندگي تباهه ڪري رهيا آهن پر انهن جا اثر خانداني نظام، تعليم، ۽ سماجي قدرن تي پڻ ظاهر ٿي رهيا آهن.منشيات نوجوانن لاءِ سڀ کان وڏو خطرو بڻجي چڪو آهي. ڪيترائي نوجوان، خاص طور تي بيروزگاري ۽ سماجي دٻاءُ جي ڪري، منشيات جي عادي ٿي رهيا آهن. اها عادت نه رڳو انهن جي صحت تي خراب اثر ڇڏي ٿي پر انهن جي مستقبل کي به تباھ ڪري ٿي.
منشيات جي واپرائڻ سان گڏوگڏ ڏوهن جو لاڙو پڻ وڌي رهيو آهي. منشيات جا عادي ماڻهو چوريون، ڦر، ۽ ٻين غير قانوني سرگرمين ۾ ملوث ڏٺا ويا آهن، جنهن سان علائقي ۾ امن امان جي صورتحال وڌيڪ خراب ٿي رهي آهي.منشيات نه رڳو هڪ فرد کي نقصان ڏئي ٿي پر ان سان لاڳاپيل سمورو خاندان متاثر ٿئي ٿو. منشيات واپرائيندڙ شخص جي ڪري گهريلو زندگي ۾ تڪرار، مالي مسئلا، ۽ ذهني دٻاءُ پيدا ٿي ٿو، جنهن سان خانداني نظام تباهه ٿي ٿو وڃي.
ٽنڊوالهيار ۾ منشيات جو واپار ۽ پوليس جي بدعنواني هڪ سنگين سماجي مسئلو آهي، جنهن کي نظرانداز ڪرڻ ممڪن ناهي. جيڪڏهن هن مسئلي کي حل ڪرڻ لاءِ فوري قدم نه کنيا ويا ته اهو سماج لاءِ وڌيڪ خطرناڪ ثابت ٿيندو. پوليس جي بدعنواني جو خاتمو، منشيات جي وڪري تي پابندي ۽ سماجي شعور پيدا ڪرڻ ئي ان مسئلي جو مستقل حل ٿي سگهي ٿو.
