نوجانن جي تعليم لاءِ ويچار ۽ جامع رٿابندي جي ضرورت

حيدرآباد لٽريچر فيسٽيول ۾ Elevating Minds, The Future of Higher Education جي موضوع تي هڪ شاندار سيشن ٿي گذريو، جتي سنڌ جي مختلف يونيورسٽين جا وائس چانسلر ۽ تعليم جا ماهر گڏ ٿيا. هن سيشن ۾ خاص طور تي نوجوانن جي تعليم، ٽيڪنيڪل اسڪلز، ۽ يونيورسٽي جي بنيادي مسئلن تي تفصيلي بحث ڪيو ويو. سيشن جا خاص مهمانن ۾ وائس چانسلرز ۽ تعليمي ماهرن پنهنجي خيالن جو اظهار ڪندي ڪجهه اهم نقطا اجاگر ڪيا، جهڙوڪ:

ڊاڪٽر فتح محمد مري: تعليم کي صرف ڊگري حاصل ڪرڻ تائين محدود نه ٿيڻ گهرجي، پر ان کي عملي زندگي لاءِ ڪارائتو بڻائڻ ضروري آهي.

ڊاڪٽر آصف شيخ: "اسان جي نوجوانن کي عالمي معيار تي مقابلو ڪرڻ لاءِ ٽيڪنيڪل ۽ ڊجيٽل اسڪلز سکڻيون پونديون.”

ڊاڪٽر مدد علي شاهه: "يونيورسٽي جو ڪم صرف علم مهيا ڪرڻ نه، پر نوجوانن کي جديد مسئلن جو حل مهيا ڪرڻ لاءِ تيار ڪرڻ آهي.”

سيشن دوران وائس چانسلرز اعتراف ڪيو ته سنڌ جي يونيورسٽين کي ڪجهه اهم مسئلن جو سامهون آهي:

1. پراڪٽيڪل تعليم جي کوٽ: يونيورسٽين ۾ ڪلاس روم تعليم ته مهيا ڪئي وڃي ٿي، پر ميدان ۾ تجرباتي سکيا لاءِ موقعا محدود آهن.
2. ريسرچ ڪلچر جي کوٽ: نوجوانن کي تحقيق لاءِ نه فقط وسيلن جي ضرورت آهي، پر هڪ اهڙي تعليمي ماحول جي پڻ جيڪو انهن کي همٿائي.
3. ٽيڪنيڪل اسڪلز جي عدم موجودگي: اڄ جي دور ۾ مصنوعي ذهانت (AI) ۽ ڊجيٽل مارڪيٽنگ جهڙيون مهارتون نئين نوڪري جي مارڪيٽ ۾ ضروري آهن، پر انهن تي يونيورسٽين ۾ گهٽ ڌيان ڏنو وڃي ٿو.

شاگردن جي وڏي تعداد هن سيشن ۾ شريڪ ٿي، جتي هنن مختلف موضوعن تي سوال ڪيا، جيئن:

"ڇا اسان جي يونيورسٽيون عالمي معيار تي ڪيئن پهچنديون؟” "ٽيڪنيڪل اسڪلز سکڻ لاءِ ڪهڙا قدم کڻڻ گهرجن؟”

"ريسرچ لاءِ بنيادي وسيلن کي ڪيئن بهتر بڻائي سگهجي ٿو؟”

وائس چانسلرز انهن سوالن جو جواب ڏيڻ لاءِ وقت ورتو ۽ يقين ڏياريو ته يونيورسٽين ۾ انهن مسئلن کي حل ڪرڻ لاءِ پاليسيون ٺاهيون وينديون.

هن سيشن مان ڪي اهم تجويزون سامهون آيون:

1. يونيورسٽين ۾ انڊسٽري لنڪج وڌائڻ: يونيورسٽين کي انڊسٽري سان گڏجي شاگردن لاءِ انٽرنشپس ۽ عملي تربيت جا موقعا فراهم ڪرڻ گهرجن.
2. ٽيڪنالاجي تي ٻڌل ڪورسز: مصنوعي ذهانت، روبوٽڪس، ۽ ڊيٽا سائنس جهڙن جديد موضوعن تي ڪورس متعارف ڪرايا وڃن.
3. شاگردن جي رهنمائي لاءِ ڪائونسلنگ سيلز: يونيورسٽين ۾ شاگردن جي مسئلن ۽ ڪيريئر پلاننگ لاءِ خاص صلاح مشوري جا مرڪز قائم ٿيڻ گهرجن.

هي سيشن رڳو هڪ ڊائلاگ نه پر هڪ اهڙو پليٽفارم ثابت ٿيو، جتي نوجوان پنهنجي مسئلن جو حل ڳولي رهيا هئا. سنڌ جي يونيورسٽين کي هاڻي اهو ڏسڻو پوندو ته اهي پنهنجي شاگردن کي ڪيئن وڌيڪ پراڪٽيڪل ۽ ٽيڪنيڪل طور تي تيار ڪري سگهن ٿيون. ان کان علاوه، اهڙن سيشنز کي وڌيڪ وڌائڻ گهرجي ته جيئن وڌيڪ يونيورسٽيون ۽ شاگرد انهن مان فائدو وٺي سگهن.

نوٽ: اسان جا نوجوان نه رڳو پرجوش آهن پر پنهنجي وائس چانسلرز ۽ تعليمي ماهرن کان جواب به گهرن ٿا. ان ڪري، انهن جي صلاحيتن کي صحيح رستي تي آڻڻ لاءِ جامع رٿابندي جي ضرورت آهي.