ڪراچي (پ ر) امير جماعت اسلامي سنڌ ڪاشف سعيد شيخ وفد سان گڏجي جميعت علماءَ اسلام ف جي صوبائي امير ۽ خانقاهه هاليجي شريف جي چشم و چراغ سائين عبدالقيوم هاليجي سان ملاقات ڪئي. ٻنهي اڳواڻن ملڪ ۽ سنڌ جي سياسي صورتحال تي خيالن جي ڏي وٽ ڪئي، خاص طور تي اترسنڌ سنڌ ۾ امن و امان جي خراب صورتحال ۽ حڪومتي بيحسي تي ڳڻتيءَ جو اظهار ڪيو. وفد ۾ جماعت اسلامي سنڌ جو نائب امير حافظ نصر الله چنا، ڊپٽي جنرل سيڪريٽري علامه حزب الله جکرو، حافظ امان الله تنيو، مفتي عبدالڪريم، مولانا عبدالرحيم ۽ وزیراحمد انڍڙپڻ شامل هئا. صوبائي امير جي يو آءِ سنڌ جي امير سائين عبدالقيوم هاليجي کي سنڌ ۾ بدامني ۽ ڌاڙيل راڄ جي خاتمي لاءِ جماعت اسلامي پاران 12 جنوري تي سکر ۾ ٿيندڙ آل پارٽيز ڪانفرنس جو دعوت نامو پڻ پيش ڪيو. ڪاشف سعيد شيخ چيو ته درياِ سنڌ جي پاڻي تي ڌاڙي کان وٺي ڌاڙيل راڄ تائين پيپلزپارٽي جي سنڌ حڪومت جي نااهلي ۽ سنڌ دشمني معاف ڪرڻ جھڙي نه آهي. هن چيو ته سياري جي مند ھئڻ باوجود سنڌ ۾ بجلي ۽ گيس جي بدترين لوڊشيڊنگ قابل مذمت ۽ سنڌ حڪومت جي ناڪامي آهي. عوام کي بنيادي حق ڏيارڻ بدران اقتدار جي خاطر سوديبازي جمھوريت جي دعويٰ ڪندڙ پارٽي لاءِ فڪر جوڳي ڳالهه آهي.
