اسلام آباد (م ڊ) بيلاروس جو صدر اليگزينڊر لوڪاشنڪو ٽن ڏينهن جي دوري تي اسلام آباد پهچي ويو. وزيراعظم شهباز شريف نور خان ايئربيس تي بيلاروس جي صدر جي آجيان ڪئي. ان موقعي تي نائب وزيراعظم ۽ پرڏيهي وزير اسحاق ڊار، گهرو وزير محسن نقوي، عطا تارڙ ۽ ٻيا موجود هئا. دوري دوران ٻنهي ملڪن وچ ۾ ٻطرفي سهڪار ۽ رابطا وڌائڻ تي ڳالهيون ٿينديون. ٻئي پاسي واپار واري وزير ڄام ڪمال ۽ بيلاروس جي توانائي واري وزير اسلام آباد ۾ بزنس فورم جي گڏيل صدارت ڪئي. ٻنهي ملڪن جي ڪمپنين وچ ۾ 8 مفاهمتي يادداشتن ۽ معاهدن تي صحيحون ٿيون. ٻنهي ملڪن جي دوا ساز ڪمپنين وچ ۾ 5 سالن جو معاهدو، فارميسين جي رجسٽريشن، دوائن جي سپلاءِ، نيوٽريشن فوڊ، آٽوموبائل شين، جانورن جي دوائن جي سپلاءِ ۽ لاجسٽڪ شعبي جا معاهدا شامل آهن. واپار واري وزير ڄام ڪمال ٻنهي ملڪن وچ ۾ واپاري رنڊڪون گهٽ ڪرڻ ۽ مارڪيٽ تائين رسائي سولي بڻائڻ تي زور ڏيندي چيو ته پاڪستان ۾ پرڏيهي سيڙپڪاري لاءِ توانائي، زراعت، آءِ ٽي ۽ ٻين شعبن ۾ وسيع موقعا آهن. گوشت، ڊيري ۽ زرعي شين جي برآمد وڌائينداسين. ٻئي پاسي بيلا روس جي توانائي واري وزير اسلام آباد ۾ لوڪ ورثا پهچي رڪشي جي سواري پڻ ڪئي. هوڏانهن پرڏيهي وزير ۽ نائب وزيراعظم اسحاق ڊار سان بيلا روسي هم منصب ميڪسم ريجنڪوف ملاقات ڪئي. ملاقات ۾ ٻطرفن لاڳاپن ۽ علائقائي معاملن تي ڳالهيون ڪيون ويون.
