اسلام آباد(م ڊ) پاڪستان عالمي مالياتي فنڊ (آءِ ايم ايف) جي ايندڙ مالي سال ۾ ڪرنسي جي قدر ۾ 16 سيڪڙو گهٽتائي جي مفروضي کي نظرانداز ڪندي نئين بجيٽ 295 رپيا ڊالر جي مٽا سٽا تي تيار ڪرڻ جو فيصلو ڪيو آهي. وفاقي بجيٽ جون جي ٻئي هفتي ۾ پيش ڪرڻ جو امڪان آهي. ناڻي واري وزارت هڪ آفيس يادداشت جاري ڪئي آهي، جنهن ۾ مالي سال 25-2024 جي بجيٽ لاءِ مقامي ڪرنسي جي سراسري قدر 295 رپيا في ڊالر مقرر ڪئي وئي آهي. رپئي ۽ ڊالر جي برابري به دفاعي بجيٽ تي اثر انداز ٿئي ٿي. بچاءَ واري وزارت 2.27 ٽريلين روپين جي بجيٽ جي درخواست ڪئي آهي جڏهن ته ناڻي واري وزارت هن وقت تائين 2.1 ٽريلين روپين جو اشارو ڏنو آهي. مٽا سٽا جي شرح هٿياربند فوجن جي ترقياتي پروگرام جي حد تائين دفاعي بجيٽ جي مختص تي اثر انداز ٿيندي.
