اسلام آباد: (ويب ڊيسڪ) پاڪستان حڪومت ڀاڻ جي رقم سڌي ريت هارين کي ڏيڻ جو فيصلو ڪيو آهي.
اسلام آباد ۾ پريس ڪانفرنس ڪندي پيٽروليم واري وفاقي وزير مصدق ملڪ چيو ته اسان جي ملڪ ۾ هارين کي سبسڊي گهٽ ملندي هئي ۽ ڪارخانا وڌيڪ ملندا هئا، اهو سوچيو ويو ته ڇو نه هارين کي ڀاڻ تي سڌي سبسڊي ڏني وڃي.
هن چيو ته سڄي دنيا ۾ زراعت ۾ انقلاب اچي چڪو آهي، اسان کي پنهنجي پيداوار وڌائڻ جي ضرورت آهي، 30 کان 35 سيڪڙو ميوا مارڪيٽ ۾ پهچڻ کان اڳ ئي ضايع ٿي ويندا آهن، هارين کي معياري ٻج فراهم ڪرڻ سان پيداوار ٻيڻي ٿيندي. زمينن تي زرعي صنعتي فارم قائم ڪيا وڃن.
وفاقي وزير چيو ته اسان جي معاشري ۾ تمام گهڻي ڇڪتاڻ آهي، ان کي گهٽائڻ جي ضرورت آهي، اسان ڪوشش ڪري رهيا آهيون ته ملڪ ۾ برداشت جي فضا قائم ڪئي وڃي، وزيراعظم شهباز شريف شهري ۽ ٻهراڙي وارن علائقن لاءِ الڳ حڪمت عملي جوڙي آهي.
هن وڌيڪ چيو ته ننڍي ڪاروبار لاءِ ماهر پورهيتن کي قرض ڏنا ويندا، هارين کي سولر ٽيوب ويل لڳايا ويندا، بجلي جي مهانگي سبب هاري پريشان آهن.
