ڪراچي (ويب ڊيسڪ ) ملڪ ۾ سياري جي موسم ۾ روايتي موسمي بيماريون پکڙيل آهن، پر ڪجهه ڪيس اهڙا به سامهون آيا آهن جن جون علامتون  روايتي بيمارين کان مختلف آهن. بي بي سي موجب انهن مريضن ۾ هڪ نئين قسم جي ڪورونا جي اين ون ۽ انفلوئنزا جي سڃاڻپ ٿي آهي. گذريل هفتي، ورلڊ هيلٿ آرگنائيزيشن (ڊبليو ايڇ او) ڪورونا وائرس جي هڪ نئين قسم JN1  جي حوالي سان هڪ وارننگ جاري ڪئي هئي.  اوميڪرون جي هن ذيلي قسم کي تيزي سان پکڙجڻ سبب پراسرار قسم جي طور درجه بندي ڪيو ويو آهي. بي بي سي سان ڳالهه ٻولهه ڪندي ڦڦڙن جي بيمارين جي ڊاڪٽر عرفان ملڪ چيو ته ڪورونا، انفلوئنزا ۽ آر ايس وي وائرس ۾ ملندڙ علامتن کي ٽرپل ڊيڪر ۽ جڏهن ته ڪورونا ۽ انفلوئنزا وائرس سان متاثر مريضن ۾ ملندڙ علامتن کي ڊبل ڊيڪر وائرس سڏيو ويندو آهي. ڊاڪٽر عرفان ملڪ چيو ته هن وقت اسان وٽ ڪورونا جي سمورين علامتن سان مريض اچي رهيا آهن، جڏهن ته پاڪستان وٽ هن وقت نئين ڪورونا وائرس جي اين ون جي ٽيسٽ ڪرڻ لاءِ ڪٽس موجود نه آهن. هن چيو ته هن وائرس جي موجودگي جو پتو لڳائڻ لاءِ انتهائي حساس ڪٽس جي ضرورت آهي، جيڪا هن وقت اسان وٽ وڏي پيماني تي موجود ناهي. هن وڌيڪ چيو ته گذريل ٽن هفتن کان اهڙن مريضن ۾ نمايان واڌ ٿي آهي. سڄي دنيا ۾ ڪورونا جو نئون ويرينٽ سامهون اچڻ کانپوءِ پنجاب جي صحت کاتي به ڪورونا جي ٻيهر ٽيسٽ ڪرائڻ جو فيصلو ڪيو آهي.

پاڪستان ۾ ڪورونا جي نئين قسم جي پکڙجڻ جو خطرو گهٽ آهي: صحت وارو وزير

اسلام آباد ( ويب ڊيسڪ ) نگران صحت واري وزير ڊاڪٽر نديم جان جو چوڻ آهي ته پاڪستان ۾ ڪورونا جي نئين قسم پکڙجڻ جو خطرو تمام  گهٽ آهي، صحت واري وزارت صورتحال جي مسلسل نگراني ڪري رهي آهي.صحت واري وزير جي ترجمان جاري ڪيل بيان ۾ چيو آهي ته ڪجهه ملڪن ۾ ڪورونا جو نئون ويرينٽ سامهون آيو آهي، ڪورونا وائرس جي خبرن تي خدشا آهن، صحت واري وزارت صورتحال جي مسلسل نگراني ڪري رهي آهي. صحت واري صوبائي وزير ڊاڪٽر نديم جان جو چوڻ آهي ته هي اوميڪرون جو ذيلي وائرس آهي، جيڪو ڪجهه ملڪن ۾ مليو آهي، پاڪستان ۾ هن وقت تائين JN.1 جو ڪو به ڪيس سامهون ناهي آيو، پاڪستان ۾ ان وائرس جي پکڙجڻ جو خطرو تمام گهڻو آهي. ڊاڪٽر نديم جان وڌيڪ چيو ته عالمي صحت جي ضابطن جي سفارشن تي عمل کي يقيني بڻايو پيو وڃي.