اسلام آباد (عوامي آواز نيوز) پاڪستان تحريڪ انصاف جي امڪاني لانگ مارچ کي نظر ۾ رکندي اسلام آباد، راولپنڊي ۽ اٽڪ ۾ سيڪيورٽي جون تياريون عروج تي پهچي ويون آهن.ذريعن موجب، ٽنهي شهرن ۾ اضافي نفري پهچڻ شروع ٿي وئي آهي، جڏهن ته اهم شاهراهن تي ڪنٽينر پڻ هنگامي استعمال لاءِ تيار رکيا ويا آهن.وفاقي گادي واري شهر اسلام آباد ۾ 22 هزار کان وڌيڪ اهلڪار مقرر ڪرڻ جون تياريون ڪيون ويون آهن. ذريعن موجب، ڳنڍيل شهر راولپنڊي ۾ 13 هزار کان وڌيڪ پوليس اهلڪار مقرر ڪيا پيا وڃن، جڏهن ته خيبرپختونخوا کي پنجاب سان ملائيندڙ اهم ضلعي اٽڪ ۾ 30 هزار اهلڪار مقرر ڪيا پيا وڃن.پنجاب جي مختلف ضلعن مان اضافي نفري اسلام آباد، اٽڪ ۽ راولپنڊي منتقل ٿيڻ شروع ٿي وئي آهي. امڪاني آمدرفت روڪڻ لاءِ راولپنڊي ۾ ڪنٽينرن جي پڪڙ ڌڪڙ پڻ جاري آهي.ذريعن موجب، راولپنڊي پوليس کي ساڍا ٽي سئو ڪنٽينر تحويل ۾ وٺڻ جو هدف ڏنو ويو آهي، جڏهن ته ٻنهي ڳنڍيل شهرن جي اهم شاهراهن جي ڪنارن تي ڪنٽينر هنگامي استعمال لاءِ تيار رکيا ويا آهن.اسلام آباد ۾ اضافي نفري جي رهائش لاءِ 100 کان وڌيڪ عمارتن جي سروي مڪمل ڪئي وئي آهي. راولپنڊي پوليس جي اهلڪارن جون موڪلون اڳ ئي منسوخ ڪيون ويون هيون.
