ڪراچي(عوامي آواز نيوز) جناح سنڌ ميڊيڪل يونيورسٽي جي پروفيسر ڊاڪٽر نگهت شاهه کي ريٽائر ٿيڻ کان صرف هڪ ڏينهن اڳ صوبائي ڪابينا جي فيصلي جي روشني ۾ 3 سالن لاءِ پروفيسر مقرر ڪرڻ جي هدايت ڪئي وئي آهي.ان سلسلي ۾ سيڪريٽري بورڊز اينڊ يونيورسٽيز عباس بلوچ باقاعده نوٽيفڪيشن پڻ جاري ڪري ڇڏيو آهي. تنهن هوندي به دلچسپ ڳالهه اها آهي ته جنهن پاڪستان ميڊيڪل اينڊ ڊينٽل ڪائونسل (پي ايم اينڊ ڊي سي) جي نوٽيفڪيشن کي هن مقرري جو بنياد بڻايو ويو آهي، ان ئي نوٽيفڪيشن ۾ واضح طور چيو ويو آهي ته ريٽائرڊ فيڪلٽي جون خدمتون ڪانٽريڪٽ تي حاصل ڪرڻ جي اجازت صرف ”Enabling in nature“ يعني سهولت فراهم ڪرڻ واري نوعيت جي آهي. ان کي ڪنهن به اداري لاءِ لازمي يا پابند ڪندڙ حڪم نه سمجهيو ويندو ۽ لاڳاپيل ادارو پنهنجي ضرورت، قاعدن، ضابطن ۽ وسيلن موجب پاڻ فيصلو ڪرڻ جو مجاز هوندو.نوٽيفڪيشن ۾ 5 آگسٽ تي ٿيل صوبائي ڪابينا جي اجلاس جي ايجنڊا آئٽم نمبر 16 جو حوالو ڏيندي چيو ويو آهي ته ڪابينا ”وسيع تر عوامي مفاد“، خاص طبي خدمتن جي تسلسل، علمي قيادت، پوسٽ گريجوئيٽ ميڊيڪل تعليم، تحقيق، جدت ۽ اداري جي معيار کي يقيني بڻائڻ لاءِ وائيس چانسلر کي هدايت ڪئي آهي ته ڊاڪٽر نگهت شاهه کي 3 سالن لاءِ جي ايس ايم يو ۾ پروفيسر مقرر ڪرڻ تي غور ڪيو وڃي.تنهن هوندي به خط جي ايندڙ ئي حصي ۾ ”غور ڪرڻ“ واري عبارت عملي طور باقاعده هدايت ۾ تبديل ٿي وڃي ٿي ۽ وائيس چانسلر کي چيو ويو آهي ته پروفيسر ڊاڪٽر نگهت شاهه کي 3 سالن لاءِ پروفيسر مقرر ڪرڻ لاءِ فوري طور ضروري ڪارروائي ڪئي وڃي.وڌيڪ اهو به چيو ويو آهي ته ڪابينا جي فيصلي تي ”بغير دير ۽ جيئن جو تيئن“ عملدرآمد ڪيو وڃي ۽ ڪارروائي جي رپورٽ ترجيحي بنيادن تي يونيورسٽيز اينڊ بورڊز کاتي کي فراهم ڪئي وڃي.ٻئي طرف، هن مقرري لاءِ بنياد بڻايل پي ايم اينڊ ڊي سي جي 19 مئي 2026ع واري نوٽيفڪيشن جو متن حڪومتي هدايت بابت اهم سوال اٿاري ٿو.پي ايم اينڊ ڊي سي سرڪاري ميڊيڪل ۽ ڊينٽل ادارن کي 65 سالن جي عمر تائين ريٽائرڊ فيڪلٽي جون خدمتون خالصتاً ڪانٽريڪٽ جي بنياد تي حاصل ڪرڻ جي اجازت ڏني هئي، پر ساڳئي وقت واضح ڪيو هو ته اهو فيصلو ڪنهن به اداري لاءِ لازمي نه هوندو.پي ايم اينڊ ڊي سي جي سرڪاري ويب سائيٽ پڻ 19 مئي 2026ع تي سرڪاري ميڊيڪل ۽ ڊينٽل ادارن بابت هن پبلڪ نوٽيس جي جاري ٿيڻ جي تصديق ڪري ٿي.پي ايم اينڊ ڊي سي جي نوٽيفڪيشن ۾ اهو به واضح طور لکيل آهي ته ريٽائرڊ فيڪلٽي جي اهڙي مقرري سان مستقل مقرري، سينيئرٽي يا ملازمت ۾ مستقل ضم ٿيڻ جو ڪو حق حاصل نه ٿيندو. ان سان گڏ اهو به چيو ويو آهي ته هن قدم سان جونيئر فيڪلٽي جي ترقي جا موقعا، ڪيريئر ۾ اڳڀرائي يا ڪيڊر جو ڍانچو متاثر نه ٿيڻ گهرجي.نوٽيفڪيشن مان اهو سوال پڻ اڀري ٿو ته جڏهن پي ايم اينڊ ڊي سي فيصلو ڪرڻ جو اختيار لاڳاپيل يونيورسٽي تي ڇڏيو هو ته پوءِ هڪ مخصوص ريٽائرڊ فيڪلٽي ميمبر جي مقرري جو معاملو صوبائي ڪابينا ڏانهن ڇو موڪليو ويو؟ ۽ ڪابينا طرفان هڪ مخصوص نالي لاءِ فوري ڪارروائي ۽ عملدرآمد رپورٽ طلب ڪرڻ جي ضرورت ڇو محسوس ڪئي وئي؟خاص طور تي پي ايم اينڊ ڊي سي جو نوٽيفڪيشن ڪنهن مخصوص فرد جي مقرري جو حڪم نٿو ڏئي، پر سمورن سرڪاري ميڊيڪل ۽ ڊينٽل ادارن لاءِ هڪ عام پاليسي جي حيثيت رکي ٿو.نگهت شاهه جي مقرري سان ايسوسيئيٽ پروفيسرن ڊاڪٽر شازيه نصيب، ڊاڪٽر نسرين فاطمه، ڊاڪٽر صبا خان، ڊاڪٽر ارم ماجد ۽ ڊاڪٽر ميمونه رحمان جي سينيئرٽي متاثر ٿيڻ جو خدشو ظاهر ڪيو پيو وڃي.
