دبئي (ويب ڊيسڪ) عالمي رسالي موجب نار ملڪن جا شاهوڪار خاندان وراثتي معاملن ۾ شريعت تحت پٽن ۽ ڌيئرن جي حصن ۾ موجود فرق کي گهٽائڻ لاءِ برطانوي قانون تحت وصيت ناما تيار ڪرائي رهيا آهن.
رپورٽ موجب، ڪجهه ماهرن ان لاڙي کي”شريعت لائيٽ‘“جو نالو ڏنو آهي، جنهن تحت خاندان برطانوي قانون ۾ موجود وصيت ٺاهڻ جي آزادي کي استعمال ڪندي پنهنجا اثاثا اولاد ۾ برابريءَ جي بنياد تي ورهائڻ چاهين ٿا.
برطانوي وڪيلن موجب، اهڙا خاندان به انهن قانوني رستن مان لاڀ ماڻي رهيا آهن، جن ۾ رڳو ڌيئرون آهن يا پٽن جي ڀيٽ ۾ ڌيئرن جو انگ وڌيڪ آهي ته جيئن سندن مستقبل ۽ خانداني دولت جو تحفظ يقيني بڻائي سگهجي.
ماهرن جو چوڻ آهي ته نئين نسل ۾ وڌندڙ اولهه وارن لاڙن، منجهيل ازدواجي معاملن ۽ خطي ۾ سياسي ڇڪتاڻ پڻ خاندانن کي اثاثن ۽ جانشيني بابت بهتر منصوبابندي ڪرڻ تي مجبور ڪيو آهي.
رپورٽ موجب، نار ملڪ به پرڏيهي شهرين لاءِ اولهه جي طرز جا قانوني نظام متعارف ڪرائي رهيا آهن، جن ۾ ابوظهبي ۾ طلاق لاءِ شريعت کان ڌار متوازي قانوني رستو پڻ شامل آهي.
