ڪراچي (ويب ڊيسڪ) سنڌ جي اسڪول ايجوڪيشن کاتي سرڪاري اسڪولن جي وقتن بابت نئون شيڊيول جاري ڪري ڇڏيو.
صوبائي اسڪول ايجوڪيشن کاتي طرفان جاري ڪيل نوٽيفڪيشن موجب، پرائمري، ايليمينٽري، سيڪنڊري ۽ هائر سيڪنڊري اسڪولن لاءِ نوان وقت مقرر ڪيا ويا آهن.
نوٽيفڪيشن موجب، 31 آڪٽوبر تائين سنگل شفٽ پرائمري اسڪول صبح 8 وڳي کان منجهند اڍائي وڳي تائين کليل هوندا، جڏهن ته جمعي ڏينهن سنگل شفٽ پرائمري اسڪول صبح 8 وڳي کان منجهند 1 وڳي تائين کليل رهندا.
نوٽيفڪيشن موجب، 31 آڪٽوبر تائين سيڪنڊري ۽ هائر سيڪنڊري اسڪولن جي پهرين شفٽ صبح ساڍي ستين وڳي کان منجهند ڏيڍ وڳي تائين هوندي.
اهڙيءَ ريت پهرين نومبر کان 31 مارچ تائين سنگل شفٽ پرائمري اسڪول صبح 8:30 وڳي کان منجهند 3 وڳي تائين کليل هوندا، جڏهن ته پهرين نومبر کان 31 مارچ تائين پهرين شفٽ صبح 8 وڳي کان منجهند 1:45 وڳي تائين هوندي.
ٻي شفٽ 31 آڪٽوبر تائين سومر کان خميس منجهند 1 وڳي کان شام 6 وڳي تائين هوندي، جڏهن ته پهرين نومبر کان 31 مارچ تائين ٻي شفٽ منجهند پوڻي هڪ وڳي کان شام پوڻي 6 وڳي تائين جاري رهندي.
جمعي ڏينهن ٻي شفٽ جي ٽائمنگ صبح پوڻي 11 وڳي کان منجهند سوا 2 وڳي تائين هوندي.
