تهران (ويب ڊيسڪ) ايراني نائب پرڏيهي وزير ڪاظم غريب آبادي تصديق ڪئي آهي ته آمريڪا سان معاهدو حتمي شڪل اختيار ڪري چڪو آهي ۽ ان تي باضابطا صحيحون جمعي جي ڏينهن سوئيٽزرلينڊ ۾ ڪيون وينديون.
ايراني سرڪاري ٽي وي سان ڳالهائيندي ڪاظم غريب آبادي هڪ ڀيرو ٻيهر آمريڪا تي بي اعتمادي جو اظهار ڪندي چيو ته ”تهران آمريڪي واعدن ۽ ذميوارين تي عملدرآمد جي ڪڙي نگراني ڪندو.“
هن چيو ته ”گذريل رات اسرائيل جي بيروت تي حملي کانپوءِ ايران طرفان اسرائيل ۽ آمريڪا کي ڏنل ڌمڪين معاهدي جي متن کي حتمي شڪل ڏيڻ ۽ ڪجهه تڪراري معاملن کي حل ڪرڻ ۾ مدد ڪئي.“
نائب پرڏيهي وزير موجب، ايران کي اميد آهي ته ڳالهيون 60 ڏينهن جي عرصي ۾ مڪمل ٿي وينديون، ان عرصي دوران ايران تي مڙهيل سمورين پابندين جي خاتمي ۽ ملڪ جي ايٽمي پروگرام بابت عالمي ٺهرائن تي ڳالهه ٻول ڪئي ويندي.
ڪاظم غريب آبادي وڌيڪ چيو ته ”جنگ کانپوءِ معاشي بحالي ۽ نئين سر اڏاوت وارو معاملو به انهن 60 ڏينهن دوران ٿيندڙ ڳالهين جو اهم حصو هوندو.“
