حيدرآباد(رپورٽر) سنڌ جي روشن خيال ۽ ترقي پسند پارٽين جي اڳواڻن جيئي سنڌ محاذ چيئرمين خالق جوڻيجو سنڌين نيشنل ڪانگريس چيف آرگنائيزر محب آزاد، عوامي ورڪرز پارٽي مارڪسٽ بخشل ٿلهو، عوامي ورڪرز پارٽي علي نواز نظاماڻي، پورهيت مزاحمت مسرور شاھ، سنڌ ساگر پارٽي اڳواڻ محمد اسلم ويسر. وطن دوست اڳواڻ عرض محمد رتڙ ۽ نيشنل پارٽي اڳواڻ تاج مري پنھنجي گڏيل بيان ۾ سنڌ ۾ وڌندڙ مذهبي انتهاپسندي  جي واقعن تي سخت ڳڻتي جو اظهار ڪندي چيو آهي ته اھي واقعا سنڌ جي مذهبي رواداري ۽ انساني ڀائيچاري واري ڪلچر جي منافي ھجڻ سان گڏوگڏ پاڪستان جي قانون جي به خلاف آھن، اھو ڪنھن به ماڻهو يا ڪنهن به گروھ کي حق نٿو بڻجي ته اھو مذھب جي نالي  ۾ ڪنھن جي گھر تي چڙهائي ڪري. بطور شھري سمورن ماڻھن جا حق ۽ حيثيت برابر آهن. ھر انسان پنهنجي عملن لاءِ الله ۽ ملڪي قانون آڏو جوابده آھي. هنن چيو ته جسٽس منير جي 1954ع واري رپورٽ ۾ ئي ٻڌائي ڇڏيو هو ته اسلامي رياست ۾ هڪ مسلمان جي تعريف جي سوال تي سمورا عالم هڪ صفحي تي نه آهن. اڳواڻن چيو ته مذهبي انتهاپسندي فرقيواريت ۽ گروھ بندي جي باھ ۾ سڙڻ کان بچائڻ لاءِ سنڌ کي ھر صورت ۾ ۽ ھر قيمت ۾ بچائڻ لاءِ سڀني سڄڻن کي اڳتي اچي پنهنجو ڪردار ادا ڪرڻو پوندو. هنن چيو ته مذهبي انتهاپسندي ۽ فرقي پرستي جي نتيجي ۾ مسلم اڪثريتي ملڪن ۾ جيڪا تباھي ۽ برباديءَ ٿي آھي. سا عالم آشڪار آهي. هنن چيو ته افغانستان، شام. ايران، لبنان کان ويندي سوڊان تائين مسلمانن ھٿان، مسلمانن جو قتلام. تباھي ۽ بربادي جاري آهي، ٻئي پاسي مذهب جي نالي ۾ صهيوني اسرائيلي فلسطين، لبنان سميت ٻين مسلمان اڪثريتي ملڪن تي چڙھايون ڪري رھيو آھي. ان سان ڪو به مهاڏو نٿو اٽڪائي. سنڌ دوست اڳواڻن چيو ته سنڌ ھزارن سالن کان امن ڀائيچاري سان رھندي آئي آهي، جنهن جا 98 سيڪڙو ماڻهو بغير ڪنهن مذهبي فرق جي شاھ لطيف کي پنهنجو رھبر ۽ رهنما مڃين ٿا، جنھن جو مذھب انسان دوستي، رواداري، ڀائيچاري امن ۽ محبت جو آھي. جنھن جي نفرت کان نفرت آهي. ھنن چيو ته سنڌ جا ماڻهو محب وطن آھن، انھن تاريخ ۾ مذهب جي نالي ۾ ٿيندڙ حملن جو بنا متڀيد ۽ فرقي جي گڏجي مقابلو ڪيو آهي. ھينئر به نفرت، انتھاپسندي جٿابندي کان سنڌ کي بچائڻ لاءِ گڏجي پنهنجو تاريخي روايتي رواداريءَ وارو ڪردار ادا ڪرڻو پوندو.

لاڙڪاڻي وارو واقعو مذمت جوڳو آهي:زين شاهه

سڪرنڊ (ن ع آ)سنڌ يونائيٽيڊ پارٽي (ايس يو پي) جي مرڪزي صدرسيد زين شاه  چيو آهي ته انتهاپسندي هميشه دنيا ۾ تباهي، نفرت ۽ جنگين کي جنم ڏنو آهي، تنهن ڪري سماج ۾ امن، رواداري ۽ برداشت کي هٿي وٺرائڻ لاءِ گڏيل ڪوششن جي ضرورت آهي.سڪرنڊ ۾ پريس ڪانفرنس ڪندي هن چيو ته لاڙڪاڻي واري واقعي سميت ملڪ ۾ پيش آيل سمورا تشدد جا واقعا قابل مذمت آهن. سنڌ جي ڌرتي هميشه انسانيت، امن، محبت ۽ ڀائيچاري جو پيغام ڏيندي آئي آهي، جتي نفرت ۽ انتهاپسندي جي سوچ کي ڪڏهن به قبول نه ڪيو ويو آهي.سيد زين شاهه چيو ته سنڌ ۾ هلندڙ پاڻي تحريڪ کي ڪمزور ڪرڻ لاءِ مختلف سازشن ۽ حربن جو سهارو ورتو ويو، پر سنڌ جي باشعور عوام انهن ڪوششن کي ناڪام بڻائي ڇڏيو. هن حڪومت کان مطالبو ڪيو ته شرپسند عنصرن خلاف فوري ڪارروائي ڪئي وڃي ۽ هراساني، تشدد ۽ نفرت انگيز سرگرمين ۾ ملوث ماڻهن کي قانون موجب سزا ڏني وڃي.هن چيو ته نظرياتي اختلاف راءِ هر معاشري جو حصو هوندو آهي، پر اختلاف جي بنياد تي تشدد، ڌمڪيون ۽ حملا ڪنهن به صورت ۾ قبول نٿا ڪري سگهجن. سڀني سياسي، سماجي ۽ مذهبي قوتن کي آئين، قانون ۽ اخلاقي قدرن جي دائري اندر رهي پنهنجو ڪردار ادا ڪرڻ گهرجي.ايس يو پي جي صدر وڌيڪ چيو ته قومي ۽ عوامي مفادن جي تحفظ لاءِ جمهوري قوتن جو اتحاد ضروري آهي. سنڌ جي دريائن، زرعي زمينن، سامونڊي حدن ۽ قدرتي وسيلن جو تحفظ هر سنڌ واسي جي ذميواري آهي. هن عوام کي اپيل ڪئي ته سنڌ جي حقن، وسيلن ۽ روشن مستقبل جي تحفظ لاءِ گڏيل جدوجهد کي وڌيڪ مضبوط بڻايو وڃي.