گذريل سومر تي گڏيل عرب امارات ۽ ڏکڻ ڪوريا پنهنجي جهازن تي حملي جي خبر ڏني، جڏهن ته يو اي اي اهو به چيو ته ايران فجيره جي تيل واري بندرگاهه تي حملو ڪيو، جنهن سان وڏي باهه لڳي وئي۔ ساڳئي وقت ٽرمپ دعويٰ ڪئي ته آمريڪا آبنائي هرمز ۾ ايران جي ست تيز رفتار ٻيڙين کي نشانو بڻايو آهي۔ آمريڪي فوج موجب اهي حملا هيليڪاپٽرن ذريعي ڪيا ويا، جڏهن ته ايراني سرڪاري ميڊيا انهن دعوائن کي رد ڪندي چيو ته ٻيڙين بدران ٻه ننڍا مال بردار جهاز نشانو بڻايا ويا، جنهن ۾ پنج شهري مارجي ويا۔ ان وچ ۾ آمريڪا چيو ته ان جا جنگي جهاز ۽ آمريڪي جهنڊي وارا تجارتي جهاز آبنائي هرمز مان گذريا، جڏهن ته ايران انهن دعوائن کي مڪمل ڪوڙ قرار ڏنو ۽ چيو ته هنن هڪ آمريڪي جنگي جهاز کي خبردار ڪندڙ فائر ڪيو جنهن جي آمريڪا ترديد ڪئي۔ سامونڊي واپار واري ڪمپني مرسڪ ٻڌايو ته ان جو آمريڪي جهنڊي وارو جهاز الائنس فيئر فيڪس نيٺ آبنائي هرمز مان نڪري ويو، جيڪو آمريڪي فوجي تحفظ هيٺ منتقل ڪيو ويو۔
ساڳئي وقت يو اي اي جي سرڪاري تيل ڪمپني ايڊنوڪ سان لاڳاپيل هڪ ٽينڪر تي حملي جي خبر پڻ سامهون آئي، جڏهن ته ڏکڻ ڪوريا به پنهنجي جهاز تي ڌماڪي جي تصديق ڪئي۔ عمان جي ساحلي علائقي بخا ۾ هڪ رهائشي عمارت تي حملي سبب ٻه ماڻهو زخمي ٿيا۔
ٽرمپ هن آپريشن کي پراجيڪٽ فريڊم جو نالو ڏنو، جڏهن ته ايران جي پرڏيهي وزير عباس عراقچي ان کي پراجيڪٽ ڊيڊ لاڪ سڏيندي چيو ته هن صورتحال مان ظاهر ٿئي ٿو ته سياسي بحران جو ڪو فوجي حل ناهي۔ پسمنظر ۾، فيبروري ۾ آمريڪا ۽ اسرائيل جي ايران تي حملن کان پوءِ ايران آبنائي هرمز مان گذرندڙ جهازن تي پابنديون وڌيون هيون۔ دنيا جي لڳ ڀڳ ويهه سيڪڙو تيل ۽ قدرتي گيس هن اهم آبي گذرگاهه مان گذري ٿي، جنهن سبب هتي هر قسم جي ڇڪتاڻ سڌي طرح عالمي معيشت تي اثر انداز ٿئي ٿي۔ اپريل ۾ اعلانيل جنگ بندي باوجود، صورتحال ٻيهر ڳڻتي جوڳي ٿي وئي آهي، ۽ هاڻي لڳي ٿو ته خطو ٻيهر وڏي تڪرار ڏانهن وڌي رهيو آهي۔
