اسلام آباد (ويب ڊيسڪ) ايران سان امن ڳالهين لاءِ نائب صدر جي ڊي وينس جي قيادت ۾ آمريڪي اسلام آباد پهچي ويو آهي.
جمعي جي رات ايراني وفد جي آمد کانپوءِ نائب صدر جي ڊي وينس جي قيادت ۾ آمريڪي وفد به ٻنهي ملڪن جي وچ ۾ ڳالهين لاءِ اسلام آباد پهچي ويو آهي.
ايئرپورٽ تي پرڏيهي وزير اسحاق ڊار ۽ گهرو وزير محسن نقوي، آرمي چيف عاصم منير ۽ آءِ ايس آءِ جي سربراهه ليفٽيننٽ جنرل عاصم ملڪ وفد جي آجيان ڪئي.
پرڏيهي کاتي طرفان جاري ڪيل بيان موجب، آمريڪي نائب صدر جي آجيان ڪندي نائب وزيراعظم اسحاق ڊار علائقائي ۽ عالمي سطح تي جٽادار امن ۽ استحڪام جي حاصلات لاءِ آمريڪا جي عزم کي ساراهيو.
پرڏيهي کاتي موجب، آمريڪي وفد ۾ وچ اوڀر لاءِ خاص نمائندو اسٽيو وٽڪوف ۽ صدر ٽرمپ جو ناٺي جيرڊ ڪشنر شامل آهن.
پڌرائي ۾ چيو ويو آهي ته اسحاق ڊار ان اميد جو اظهار ڪيو ته ڌريون هاڪاري انداز ۾ ڳالهه ٻولهه ڪنديون.
ان موقعي تي هن تڪرار جي پائيدار ۽ دائمي حل لاءِ ڌرين کي سهولت فراهم ڪرڻ جي پاڪستان جو عزم ورجايو.
