ڪراچي (ع آ رپورٽ) وچ اوڀر ۾ جاري جنگي صورتحال ۽ فضائي سفر ۾ رنڊڪن سبب رمضان جي مبارڪ مهيني ۾ پاڪستان ايندڙ روڪ رقم ۾ 50 سيڪڙو تائين گهٽتائي ٿي آهي. پاڪستان ايڪسچينج ڪمپنيز ايسوسي ايشن جي چيئرمين ملڪ بوستان موجب، عام طور تي رمضان ۾ مسافر پاڻ سان گڏ 15 کان 20 ملين ڊالر کڻي ايندا هئا، پر هن سال اها رقم گهٽجي صرف 7 ملين ڊالر رهجي وئي آهي. ان کوٽ جو وڏو سبب ايران،اسرائيل ۽ آمريڪا جي وچ ۾ ڇڪتاڻ آهي، جنهن ڪري فلائٽس متاثر ٿيون آهن ۽ هوائي ٽڪيٽن جي قيمتن ۾ به وڏو اضافو ٿيو آهي. جيتوڻيڪ بينڪنگ چينلز ذريعي موڪليل رقم ۾ واڌ جو امڪان آهي، پر ماهرن خبردار ڪيو آهي ته جيڪڏهن وچ اوڀر ۾ جنگ ڊگهي ٿي وئي ته سعودي عرب ۽ يو اي اي ۾ رهندڙ پاڪستاني ملازمن جي روزگار تي به ناڪاري اثر پوندا. ياد رهي ته پاڪستان جي مجموعي ناڻي ذخيرن جو 60 سيڪڙو حصو وچ اوڀر مان ئي اچي ٿو.
