اسلام آباد (عمران شفقت) آمريڪي صدر پنهنجي ويزا پاليسي کي تبديل ڪندي، هڪ ايگزيڪيوٽو آرڊر ذريعي 75 ملڪن تي ويزا پابنديون لاڳو ڪيون، ۽ ڪجهه قسمن جي اميگريشن ويزا کي عملي طور تي روڪيو ويو آهي. انهن ملڪن جي شهرين لاءِ آمريڪا ۾ مستقل رهائش اختيار ڪرڻ لاءِ ويزا جو عمل اڻ ڄاڻايل مدي تائين معطل ڪيو ويو آهي. انهن 75 ملڪن ۾ پاڪستان شامل آهي، جڏهن ته ڀارت هن فهرست ۾ شامل ناهي. مئي جي جنگ کانپوءِ ٽرمپ پاڪستان جو ذڪر هاڪاري ۽ دوستاڻي انداز ۾ ڪندو رهيو، اسان جي فيلڊ مارشل کي دعوت ڏني وئي، وزيراعظم شهباز شريف جي تعريف ڪئي وئي. معدنيات ۽ بِٽ ڪوائن سان لاڳاپيل ڳالهيون ۽ معاهدا پڻ پاڪستان سان جاري هئا، تازو ئي لبرٽي فنانشل جي حوالي سان هڪ ايم او يو تي صحيحون ٿيون ته پاڪستان ويزا پابندين جي اثر هيٺ آيو. سوال اهو آهي ته جڏهن لاڳاپا ظاهري طور تي سٺا هئا ته هي پابندي ڇو ۽ ڪيئن لڳائي وئي؟ هفتيوار بريفنگ ۾ پرڏيهي آفيس کان به ان حوالي سان سوال ڪيو ويو، جنهن تي ترجمان روايتي سفارتي جواب ڏنو ته حڪومت هن مسئلي تي آمريڪي اختيارين سان رابطي ۾ آهي. ياد رهي ته اهي پابنديون مستقل رهائش سان لاڳاپيل مهاجر ويزا تي لاڳو ڪيون ويون آهن، جڏهن ته B1 ۽ B2، يعني ڪاروباري ۽ سياحتي ويزا، جاري رهنديون، جڏهن ته، انهن لاءِ فيس، انٽرويو ۽ انتظار جو عمل برقرار رهندو. بي بي سي ان حوالي سان هڪ اهم سبب اهو ڏنو ته 4 جنوري 2026 تي ٽرمپ پنهنجي  سوشل ميڊيا پليٽ فارم ٽرٿ سوشل تي 120 ملڪن جي هڪ فهرست جاري ڪئي، جنهن ۾ اهو ٻڌايو ويو ته ڪهڙن ملڪن جا مهاجر آمريڪي حڪومت جي مدد تي سڀ کان وڌيڪ ڀاڙين ٿا.هن فهرست موجب، ڀوٽان، يمن ۽ صوماليا سڀ کان مٿي آهن، جڏهن ته لڳ ڀڳ 40 سيڪڙو پاڪستاني-آمريڪي شهري ڪنهن نه ڪنهن طريقي سان آمريڪي حڪومت جي مدد مان فائدو حاصل ڪن ٿا.  هي اهو نقطو آهي جنهن کي ٽرمپ انتظاميه هڪ بار سمجهي ٿي. اهو ناقابل قبول آهي ته ڪو شهري بڻجڻ کان پوءِ خود ڪفيل ٿيڻ بدران رياست تي بار بڻجي وڃي.  هن حوالي سان، اهو سوال پڻ اٿاريو پيو وڃي ته جڏهن ڀارت مان وڏي انگ ۾ ماڻهن کي آمريڪا مان واپس موڪليو ويو، ته ڀارتي شهرين تي اهڙيون پابنديون ڇو نه لڳايون ويون؟ سبب اهو آهي ته ڀارتي برادري کي آمريڪي معيشت تي بار نه سمجهيو ويندو آهي. سوشل ميڊيا تي اهو بحث پڻ ٿي رهيو آهي ته صدر ٽرمپ پاران وزيراعظم شهباز شريف ۽ فيلڊ مارشل عاصم منير جي تعريف ڪرڻ جي باوجود پاڪستان کي هن فهرست ۾ ڇو شامل ڪيو ويو. پاڪستان نوبل امن انعام لاءِ ٽرمپ جي سفارش به ڪئي هئي. بهرحال، تجزيه نگارن جو چوڻ آهي ته ٽرمپ پنهنجي قوم ۽ پنهنجي ٽيڪس ڏيندڙن جي مفادن کي ترجيح ڏئي ٿو. پرڏيهي آفيس جي ترجمان موجب، پاڪستان هن معاملي تي آمريڪي عملدارن سان رابطي ۾ آهي ۽ اميد ڪري ٿو ته مسئلو جلد حل ٿي ويندو. اسلام آباد ريسرچ انسٽيٽيوٽ جي ايگزيڪيوٽو ڊائريڪٽر حسن نديم جو اهو به چوڻ آهي ته پاڪستان جو هن فهرست ۾ گهڻي وقت تائين رهڻ جو امڪان ناهي. ڏکڻ ايشيائي سياست تي ويجهي نظر رکندڙ تجزيه نگار مائيڪل ڪوگلمين مطابق، پاڪستان سان تازي گرمجوشي به ان کي هن فيصلي کان بچائي نه سگهي. آمريڪا جي اڳوڻي قومي سلامتي صلاحڪار جان بولٽن پڻ هن فيصلي کي چين ۽ پاڪستان جي وڌندڙ لاڳاپن سان ڳنڍيو. آخر ۾، اهو چوڻ غلط نه هوندو ته هن صورتحال ۾، ٻاهرين ملڪن ۾ رهندڙ اهي فرد جيڪي رياست تي بار آهن، انهن کي به پنهنجو ڪردار ڏسڻو پوندو، ڇاڪاڻ ته پوري قوم کي انهن عنصرن جا نتيجا ڀوڳڻا پوندا.

اميگرنٽ ويزا پروسيسنگ روڪڻ بابت آمريڪا سان رابطي ۾ آهيون: پرڏيهي ترجمان

اسلام آباد (بيورو رپورٽ) پرڏيهي آفيس جي ترجمان چيو آهي ته پاڪستان آمريڪي اميگرينٽ ويزا جي پروسيسنگ بابت آمريڪي اختيارين سان رابطي ۾ آهي ۽ اميد آهي ته اميگرينٽ ويزا جي معمول واري آن لائين پروسيسنگ جلد بحال ٿي ويندي.اسلام آباد ۾ هفتيوار بريفنگ  ڏيندي ترجمان پرڏيهي آفيس جي ترجمان طاهر اندرابي چيو ته پاڪستان جي ايران جي صورتحال بابت اڳڀرائي تي گهري نظر آهي، پاڪستان صورتحال جي پرامن حل لاءِ ٿيندڙ سمورين ڪوششن جي حمايت ڪري ٿو ۽ اميد رکي ٿو ته ايران ۾ امن ۽ استحڪام قائم رهندو. ترجمان چيو ته ايران پاڪستان جو پاڙيسري ملڪ ۽ عالمي برادري جو اهم رڪن آهي، تنهنڪري پاڪستان ايران کي هڪ دوست ۽ برادر ملڪ طور پرامن ۽ خوشحال ڏسڻ چاهي ٿو، پاڪستان ۽ ايران جي عوام وچ ۾ گهرا تاريخي، ثقافتي ۽ مذهبي لاڳاپا آهن. اميگرينٽ ويزا جي معطلي بابت ترجمان چيو ته پاڪستان آمريڪي اميگرينٽ ويزا جي پروسيسنگ بابت آمريڪي اختيارين سان رابطي ۾ آهي ۽ اميد آهي ته اميگرينٽ ويزا جي معمول واري آن لائين پروسيسنگ جلد بحال ٿي ويندي. ان کانسواءِ ترجمان ڀارتي آرمي چيف جي الزامن کي سختي سان رد ڪندي چيو ته ڀارت طرفان دهشتگردي بابت الزام سياسي مقصدن لاءِ گهڙيل هٿ ٺوڪيون ڪهاڻيون آهن.ترجمان چيو ته افغانستان سوڌو خطي ۾ ڀارتي حمايت يافته دهشتگرد نيٽ ورڪن جي نشاندهي ٿي چڪي آهي، ڀارت طرفان عدالتن کان مٿانهان قتل ۽ رياستي سرپرستي هيٺ دهشتگردي جا مثال به رڪارڊ تي موجود آهن.