ڪراچي (رپورٽر ) سنڌ جي وڏي وزير سيد مراد علي شاهه ترقياتي پورٽ فوليو جو جائزو وٺندي صحت کاتي کي هدايت ڪئي ته 16 فليگ شپ منصوبن تي ڪم جي رفتار تيز ڪئي وڃي وڏي وزير جي صدارت هيٺ 2025-26ع جي جائزي واري اجلاس وزيراعليٰ هائوس ۾ ٿيو جنهن ۾ صوبائي وزير صحت ڊاڪٽر عذرا فضل پيجوهو، وزير رٿابندي ۽ ترقيات جام خان شورو، وزير ورڪس اينڊ سروسز حاجي علي حسن زرداري، چيف سيڪريٽري آصف حيدر شاهه، چيئرمين پلاننگ اينڊ ڊولپمينٽ نجم شاهه، سيڪريٽري ناڻو فياض جتوئي، وڏي وزير جو سيڪريٽري رحيم شيخ، سيڪريٽري ورڪس اينڊ سروسز نواز سوهو، سيڪريٽري صحت ريحان بلوچ ۽ ٻيا آفيسر شامل هئا۔ صحت کاتي سالاني ترقياتي پروگرام 2025-26ع بابت تفصيلي بريفنگ ڏني جيڪو 178 اسڪيمَن تي مشتمل آهي جن مان 140 جاري ۽ 38 نيون اسڪيمون آهن جن لاءِ 45.37 ارب رپيا رکيا ويا آهن۔ ڊاڪٽر عذرا پيچوهو ٻڌايو ته فنڊز رکڻ، جاري ڪرڻ ۽ خرچن جي سخت نگراني ڪئي وئي آهي ،اجلاس ۾ چيو ويو ته اين آءِ سي وي ڊي جو پيڊياٽرڪ ڪارڊيڪ يونٽ بابت نظرثاني ٿيل پي سي-ون 9.924 ارب رپين جي لاڳت سان جمع ٿي چڪو آهي وڏي وزير هدايت ڪئي ته عمل فوري مڪمل ڪيو وڃي۔ وڏي وزير کي ٻڌايو ويو ته گلبهار ٽائون انچولي، فيڊرل بي ايريا بلاڪ 13 ۾ 50 بستري اسپتال جي عمارت مڪمل ٿي چڪي آهي۔ سول اسپتال جي نئين ريڊيالوجي پي سي-ون به تيار ڪيو پيو وڃي۔ وڏي وزير منظوري جي عمل کي تيز ڪرڻ جي هدايت ڪئي۔ اجلاس ۾ لاڙڪاڻي ۾ 600 بستري اسپتال جي تعمير تي به غور ڪيو ويو۔ پي سي-ون منظور ڪري چڪي آهي جڏهن ته وڏي وزير منظوري ڏئي فائيل خزانه ۽ پلاننگ اينڊ ڊولپمينٽ ڏانهن اماڻي ڇڏي آهي
