نيو يارڪ (عوامي آواز رپورٽ) تجزئي نگار عائشا صديقا چيو آهي ته 9 مئي جي واقعن دوران، آرمي چيف عاصم منير پرڏيهه ۾ هو ۽ جنرل ساحر شمشاد مرزا کيس يقين ڏياريو هو ته صورتحال ڪنٽرول ۾ رهندي ۽ کيس واپس اچڻ جي ڪا ضرورت ناهي. سندس مطابق، ساحر شمشاد مرزا هڪ اداري جي سوچ رکندڙ آفيسر آهي ۽ هن اداري ۾ ورهاست يا بغاوت کان بچڻ کي ترجيح ڏني. عائشا صديقا ڊجيٽل پليٽ فارم تي رضا رومي کي سوالن جا جواب ڏيندي چيو ته ان وقت، عاصم منير لاهور ۽ پشاور ۾ موجود ڊويزنل ڪمانڊرن کي هدايت ڪئي هئي ته اهي چيئرمين جوائنٽ چيفس کان سڌو سنئون حڪم وٺن. سندس مطابق، جنرل ساحر شمشاد مرزا ان وقت آرمي چيف جو مضبوط اتحادي هو ۽ اداري جي سلامتي کي برقرار رکڻ جي حق ۾ هو.
