رپورٽون آهن ته ڪارونجهر جبل جي ڪٽائي بابت سنڌ حڪومت پاران وفاقي آئيني ڪورٽ ۾ پهتل اپيل واپس ڪرائڻ لاءِ آل سنڌ لائرز ايڪشن ڪاميٽي ۽ صوبائي وزير ناصر شاهه وچ ۾ گذريل اربع جي شام ڪامياب ڳالهيون ٿيون. سنڌ جي صوبائي وزير ناصر شاهه جي خاطري بعد وڪيلن پوءِ احتجاج به ختم ڪيو. احتجاج ڪندڙ وڪيلن سان ڳالهين دوران ناصر شاهه جو چوڻ هو ته ڪارونجهر تي اسان جو موقف به اهوئي آهي جيڪو اوهان جو آهي. ڪارونجهر معاملي تي بلاول ڀٽو جو موقف به اهوئي آهي. هن چيو ته اوهان جا 27 هين ترميم، آئيني عدالت سميت مختلف مطالبا وڏي وزير جي آڌر رکيا ويندا. ٻئي پاسي ڳالهين بعد وڪيل اڳواڻ عامر نواز وڙائچ چيو ته اسان حڪومت کي 15 ڏينهن جو وقت ڏنو آهي جو سنڌ حڪومت خاطري ڪرائي آهي ته ڪارونجهر بابت اپيل واپس ورتي ويندي. ياد رهي ته ان کان اڳ آل سنڌ لائرز ايڪشن ڪاميٽي، سنڌ حڪومت پاران وفاقي آئيني عدالت ۾ داخل اپيل واپس ڪرائڻ لاءِ سنڌ هاءِ ڪورٽ کان سي ايم هائوس تائين احتجاجي ريلي ڪڍي هئي. ان احتجاجي ريلي ۾ سنڌ جي مختلف شهرن جي وڪيلن وڏي انگ ۾ شرڪت ڪئي هئي. ائين سنڌ جي ٻين شهرن ۾ به وڪيلن عدالتي ڪاررواين جو بائيڪاٽ ڪري احتجاجي ريليون ڪڍيون هيون.
اسان آل سنڌ لائرز ايڪشن ڪاميٽي جا ٿورائتا آهيون جنهن ڪارونجهر جي ڪٽائي بابت سنڌ سرڪار جي وفاقي آئيني عدالت ۾ وڃڻ تي سڀ کان اڳ ۾ نه رڳو احتجاج رڪارڊ ڪرايو پر اهو ڪامياب به ڪرائي ڏيکاريو. سنڌ حڪومت جي وزير ناصر شاهه جو اهو چوڻ ته سنڌ حڪومت آئيني عدالت ۾ داخل ڪرايل اپيل واپس وٺندي، ان خاطري کي اسان آل سنڌ لائرز ايڪشن ڪاميٽي جي احتجاج جي ڪاميابي سمجهون ٿا، ڇاڪاڻ ته اهڙي قسم جو اظهار ان احتجاج کانپوءِ ڪيو ويو آهي. جڏهن ته سنڌ حڪومت ته پنهنجي طور تي سنڌ هاءِ ڪورٽ جي ڪارونجهر جي ڪٽائي خلاف ڏنل فيصلي کي وفاقي آئيني عدالت ۾ چئلينج ڪري چڪي هئي. بهرحال اها به سٺي ڳالهه آهي ته سنڌ حڪومت وڪيل برادري جي ان احتجاج کي روڪڻ ۽ پوليس هٿان ڪارروائي ڪرڻ جي روايتي ڪوشش نه ڪئي ۽ اهو به سٺو ٿيو جو احتجاج ڪندڙ وڪيل برادري سان صوبائي وزير ناصر ساهه ڳالهايو ۽ خاطري ڪرائي ته حڪومت سندن احتجاج جو احترام ڪري ٿي ۽ وفاقي آئيني عدالت مان اها اپيل واپس وٺندي.
هاڻي ڏسڻو اهو آهي ته سنڌ حڪومت ۽ ناصر شاهه پنهنجي موقف تي بيهن ٿا يا نه. جڏهن ته آل سنڌ لائرز ايڪشن ڪاميٽيءَ به ٻئي پاسي حڪومت کي 15 ڏينهن جي مهلت ڏني آهي. انهن پندرنهن ڏينهن اندر سنڌ سرڪار اپيل واپس نه ورتي ته اها وڪيل برادري وري روڊن تي ايندي. وڪيل برادري جي ان احتجاج تي سنڌ جي وڏي وزير مراد علي شاهه جو وري اهو بيان آڏو آيو آهي ته وڪيلن کي روڊن تي اچي عوام کي تڪليف نه ڏيڻ گهرجي. اسان جو وري اهو خيال آهي ته جيڪڏهن سنڌ حڪومت کي روڊن تي اچي احتجاج ڪرڻ تي اعتراض آهي ته ان کي پوءِ اهڙا تڪراري فيصيلا ڪرڻ ئي نه گهرجن يا اهڙا تڪراري قدم کڻڻ ئي نه گهرجن جو عوام روڊن تي اچڻ تي مجبور ٿئي.
اسان ڪجهه ڏينهن اڳ به ان موضوع تي ايڊيٽوريل لکيو هو ته جڏهن سنڌ هاءِ ڪورٽ ڪارونجهر جبل جي ڪٽائي خلاف فيصلو ٻڌايو هو ته سنڌي عوام ان تي سرهائي جو به اظهار ڪيو هو ته پوءِ سنڌ حڪومت کي ان فيصلي کي چئلينج ڪرڻ جي ضرورت ڇو محسوس ٿي ۽ ان 27 هين ترميم جي روشني ۾ جڙيل نئين وفاقي آئيني عدالت ۾ ڪارونجهر جو ڪيس رکي ان کي تڪراري بڻائڻ جي آخر ڇو ضرورت محسوس ڪئي. سنڌ حڪومت اهڙو قدم کڻي نه رڳو 27 هين ترميم، ان ترميم ذريعي جوڙيل وفاقي آئيني عدالت کي ئي تڪراري نه بڻايو آهي پر سنڌ هاءِ ڪورٽ جي فيصلي کي به رد ڪرڻ جو پڻ تاثر ڏنو آهي، جيڪو حڪومت کي نه ٿو سونهين.
ٻيو ته سنڌ حڪومت اهڙو قدم کڻي اهو به تاثر قائم ڪرايو آهي ته اها عدالت جي رڳو ان فيصلي کي تسليم ڪندي جيڪي حڪومتن جي مفادن ۾ هوندا ۽ ان ڪري ئي وفاقي آئيني عدالت قائم ڪئي وئي آهي ته جيئن حڪومتن جي مفاد ۾ ان آئيني عدالت کان فيصلا ڏياريا وڃن. ٻيو ته سنڌ حڪومت ڪارونجهر جبل جي ڪٽائي جي روڪٿام واري فيصلي کي رد ڪري سنڌي قوم ۽ وڪيل برادري کي به مشتعل ڪرڻ جي غير ضروري ۽ غير جمهوري ڪوشش ڪئي آهي جنهن خلاف آل سنڌ لائرز ايڪشن ڪاميٽيءَ فوري رد عمل ڏيکاري انتهائي وقتائتو قدم کنيو آهي. جنهن لاءِ اها مبارڪباد جي حقدار آهي، جيڪڏهن آل سنڌ لائرز ايڪشن ڪاميٽي ايئن تڪڙو احتجاج نه ڪري ها ته يقينن سنڌ حڪومت تي دٻاءُ نه پوي ها.
پر هتي سوچڻ جي ڳالهه اها آهي ته ڇا اهو رڳو وڪيل برادري، سنڌ جي قوم پرست جماعتن جو ڪم آهي ته اهي سنڌ جي عوام جي ترجماني ڪن ۽ سنڌ دشمن فيصلن خلاف مزاحمت ڪن ۽ دٻاءُ وجهن، ڇا سنڌ حڪومت جي اها پنهنجي ذميواري ناهي ته اها سنڌ جي عوام جي نمائندگي ڪري ۽ سنڌ جي مفاد ۾ فيصلا ڪري. ڇا سنڌ حڪومت کي پاڻ اها خبر ناهي ته جڏهن ڪارونجهر جبل جي اها ڪٽائي ڪري رهي هئي ته تڏهن سنڌي قوم ڪيڏي نه سراپا احتجاج هئي ۽ پوءِ جڏهن سنڌ هاءِ ڪورٽ سنڌي قوم جي خواهش پٽاندڙ ڪارونجهر جبل جي ڪٽائي کي روڪڻ جو حڪم ڏنو هو تڏهن سنڌي عوام سک جو ساهه کنيو هو ۽ اوهان وري عوام کي بي چين ڪرڻ جي هڪ افسوس جوڳي اڳڀرائي ڪئي. سو سنڌ حڪومت جي مفاد ۾ اهو آهي ته صوبائي وزير ناصر شاهه آل سنڌ لائرز ايڪشن ڪاميٽي جي مظاهرين سان جيڪو ڪارونجهر بابت اپيل واپس ڪرڻ جو واعدو ڪيو آهي تنهن تي عمل ڪري ڏيکاري.
