ڪراچي (رپورٽر) پاڪستان هندو ڪائونسل جي سرپرستي هيٺ ٽن ڏينهن جي احتجاجي سلسلي جي ٻئي مرحلي ۾ سوامي نارائن مندر تي ڀارتي دفاع واري وزير راج ناٿ سنگهه خلاف احتجاجي مظاهرو ڪيو ويو، ان موقعي تي پاڪستان هندو ڪائونسل جي اعليٰ قيادت سان گڏ سول سوسائٽي، شاگرد، ۽ ميڊيا جا وڏا تعداد به موجود هئا، چيف ڪوآرڊينيٽر ڪرشن ساگر ميڊيا سان ڳالهائيندي ٻڌايو ته سرپرست اعليٰ پاڪستان هندو ڪائونسل ڊاڪٽر رميش ڪمار جي هدايت تي ٻئي ڏينهن پڻ سنڌ جي هندو برادري سراپا احتجاج آهي. ڀارتي دفاع واري وزير جو بيان اسانجي اندروني معاملن ۾ کليل مداخلت آهي، هن چيو ته ڀارتي دفاع واري وزير جي چيڙ ڏياريندڙ بيان جي خلاف سنڌ جي مختلف شهرن، ڳوٺن ۽ گهروالي علائقن ۾ شاگرد، استاد ۽ شهرين طرفان مختلف احتجاجي ريليون ڪڍيون پيون وڃن، جنهن ۾ سنڌي هندو ڪميونٽي سخت غصو ۽ ڏک جو اظهار ڪيو آهي، پاڪستان هندو ڪائونسل جي اڳواڻن چيو ته راج ناٿ جي بيان تي نريندر مودي جي خاموشي معنا خيز آهي، بيان جو نوٽيس ورتو وڃي.
