راولپنڊي (م ڊ) اڊيالا جيل جي ذريعن جو چوڻ آهي ته عمران خان صحتمند آهي ۽ جيل ۾ ايندڙ هر ماڻهوءَ جي پي ٽي آءِ بانيءَ سان ملاقات ڪرائي ويندي آهي. جيل ذريعن جو چوڻ آهي ته پي ٽي آءِ باني جيل ۾ محفوظ ۽ صحتمند آهي، هفتي ۾ هڪ ڀيرو ساڻس بشريٰ بي بي جي ملاقات پڻ ڪرائي ويندي آهي. ذريعن موجب، اڊيالا جيل ۾ هڪ بيرڪ جا 6 ڪمرا پي ٽي آءِ باني جي استعمال هيٺ آهن، ان کانسواءِ هن لاءِ ٽي وي ۽ اخبار جي سهولت به موجود آهي. جيل ذريعن جو چوڻ آهي ته پي ٽي آءِ باني کي هفتي ۾ هڪ ڀيرو ٻاهران کاڌو گهرائڻ جي اجازت آهي، ٻاهران ديسي ڪڪڙ ۽ مڇي گهرائي ويندي آهي. ذريعن موجب، پي ٽي آءِ باني سان ملاقاتون جيل مينوئل موجب ڪرايون وينديون آهن، اڊيالا جيل جي حدن ۾ ايندڙ هر شخص جي ملاقات ڪرائي ويندي آهي، اڊيالا جيل جي حدن کان ٻاهر وارو معاملو جيل انتظاميا جي ذميواري ناهي.
