ميرپورخاص/ شاهپور چاڪر (نمائندن وٽان) جي يو آئي سنڌ جي جنرل سيڪريٽري علامه راشد محمود سومرو چيو آهي ته اهو سٺو سئنوڻ آهي ته سنڌ ۾ ڌاڙيل هٿيار ڦٽا ڪن پيا، پر خبر پئي آهي ته سنڌ حڪومت انهن هٿيارن جا ڌاڙيلن کي پئسا ڏنا آهن، ايندڙ ڪجھه ڏينهن ۾ گهوٽڪي جي علائقي جا ڌاڙيل به هٿيار ڦٽا ڪندا حڪومت جي انهن سان ڊيل هلي پئي، حڪومت ڌاڙيلن کي هٿيارن جا پئسا پئي ڏئي جنهن سان حڪومت ڪمزور ٿيندي، مولانا راشد محمود سومرو شاهپور چاڪر ۽ ميرپورخاص ۾ ميڊيا سان ڳالهائيندي وڌيڪ چيو ته منهنجو سنڌ حڪومت کان سوال آهي ته انهن ڌاڙيلن تي ساڳيو قانون لاڳو ڪيو ويندو جيڪي پوليس اهلڪار جي قتل ۾  ملوث آهن جيئن انهن ڌاڙيلن تي لاڳو ٿيندو جيڪي سردار، ايم پي ايم اين جي پٽ يا ساٿي جي قتل ۾ ملوث آهن، منهنجي معلومات موجب، سنڌ حڪومت هٿيار خريد ڪيا آهن.پيپلز پارٽي ۽ مسلم ليگ (ن) جي وچ ۾ ڪُشتي جو ڊرامو هلي رهيو آهي. جيڪڏهن شفاف چونڊون ٿيون ته بلاول پنهنجي سيٽ بچائي نه سگهندو، جي يو آءِ افغانين کي ڪڍڻ جي خلاف ناهي، پر طريقن ۾ فرق آهي، جيڪي غيرقانوني افغاني وڃن پيا انهن کي ملڪيتن جو معاوضو ڏنو وڃي، سنڌ مان ڌاڙيلن جي خاتمي لاءِ کين غير مسلح ڪرڻ واري قدم جي حمايت ڪيون ٿا پر ان جي طريقيڪار تي اعتراض آهن جن ڌاڙيلن معصوم عوام سميت سرڪاري ملازمن پوليس عملدارن اهلڪارن کي اغو ۽ قتل ڪيو انهن لاءِ ڳاڙهو ڪارپيٽ وڇائي ٻڪر ۽ ڪڪڙ جون ديگيون تيار ڪيون ويون.

ڌاڙيلن، ڀوتارن ۽ پوليس جو ڳٺ جوڙ ختم ڪيو وڃي:ڪاشف سعيد

ڪراچي/گھوٽڪي (پ ر) جماعت اسلامي سنڌ جي امير ڪاشف سعيد شيخ گھر ڪئي آھي ته سنڌ ۾ امن امان جي بحالي  توڙي ڏوھن جي خاتمي لاءِ ڌاڙيل ڀوتار ۽ پوليس جي ڪارين رڍن تي ٻڌل ٽڪنڊو ختم ڪيو وڃي، ڏوھارين توڙي انھن جي سرپرستيءَ ڪندڙ بنگلن جي مالڪن کي به قانون جي پنجوڙ ۾ آندو وڃي، سنڌ ۾ وڌندڙ بدامني ڌڙيل راڄ اغوا توڙي ڀتي خوري جي وڌندڙ ناسور سبب سنڌ جو امن، معيشت ۽ ڪاروبار تباھ ٿي ويو آھي، جڏهن ته پوليس ۽ ٻيا قانون لاڳو ڪندڙ ادارا ڏوھارين خلاف قدم کڻڻ بدران خاموش تماشائي بڻيل آھن، لڳي ٿو ته ڌاڙيلن نه، پر سنڌ حڪومت ڌاڙيلن آڏو سرينڊر ڪيو آھي، 21نومبر کان لاھور ۾ جماعت اسلامي جو ٽن ڏينهن جو تاريخي اجتماع منعقد ٿيندو جنھن ۾سنڌ سميت سڄي ملڪ مان لکين ماڻھو شريڪ ٿيندا. اھڙن خيالن جو اظهار ھن ڏھرڪي ۾ ضلعي گھوٽڪي جي عھديدارن جي اجلاس کي خطاب دوران ڪيو، ڪاشف سعيد شيخ وڌيڪ چيو ته جماعت اسلامي واحد سياسي ۽ ديني جماعت آهي جنهن هميشه سنڌ جي ٻرندڙ مسئلن کي اجاڳر ڪرڻ لاءِ هر پليٽ فارم تي ڀرپور احتجاج ڪيو آهي پوءِ اهو کڻي سنڌوءُ مٿان غير قانوني ڪينال ڪڍڻ وارو مسئلو هجي، ڌاڙيل راڄ يا ڪارپوريٽ فارمنگ وارو اشو هجي اسان ڪنهن به موقعي تي سنڌ جي ماڻهن کي اڪيلو ناهي ڇڏيو.