اسلام آباد(عمران شفقت)مريم نواز کي ٻه پيغام مليا. هڪ پيغام تي هن فوري ردعمل ڏئي حڪم جاري ڪيا، پر ٻئي پيغام تي هوءَ اڃا ڪن نٿي ڏئي. اهو ٻيو پيغام ڪير ڏنو ۽ ڇا هو، اهو اهم سوال آهي.اڄ پيپلز پارٽي ۽ مسلم ليگ (ن) جي وچ ۾ مرڪزي سطح تي ملاقات ٿي، ڳالهين ذريعي اختلاف حل ٿي ويا ۽ پيپلز پارٽي کي راضي ڪيو ويو. پر سڀ کان وڏو مسئلو ڪشمير جو آهي.ڪشمير ۾ عوامي ايڪشن ڪميٽي 29 سيپٽمبر تي لاڪ ڊائون جو اعلان ڪيو. انهن جي 38 مطالبن مان تقريباً 97-98 سيڪڙو تسليم ڪيا ويا، پر ٻن اهم مطالبن تي حڪومت راضي نه ٿي.پهريون مطالبو اهو هو ته مهاجرن لاءِ مخصوص سيٽن ذريعي اسٽيبلشمينٽ ڪشمير ۾ مرضي جون حڪومتون ٺاهي ٿي، تنهن ڪري ان کي ختم ڪيو وڃي. ٻيو سڀ کان خطرناڪ مطالبو اهو هو ته آزاد ڪشمير مان پاڪستاني فوج نيڪالي ڏني وڃي. اهو مطلب ٿيو ته لائن آف ڪنٽرول تي به پاڪستاني فوج هجي نه. ڇا عوامي ايڪشن ڪميٽي ڪشمير کي ڀارت حوالي ڪرائڻ چاهي ٿي؟ ڇو ته جيڪڏهن فوج هٽي ته ڀارتي فوج اڳتي وڌي قبضو ڪري وٺندي.اها ايجنڊا ڪشمير ۾ ويٺل حقيقي سياسي قيادت جي نه پر انهن قومپرستن جي آهي، جيڪي سوئزرلينڊ، فرانس، انگلينڊ ۽ آمريڪا ۾ ويٺل آهن ۽ ڀارتي سفارتخانن سان رابطي ۾ آهن. مقصد آزاد ۽ خودمختيار ڪشمير ٺاهڻ آهي، جيڪو عملي طور ناممڪن آهي. ٻن ايٽمي ملڪن جي وچ ۾ اهڙي "خودمختياري” نه ٿي هلي سگهي.آزاد ڪشمير ۾ صورتحال خطرناڪ ٿي چڪي آهي. پوليس اهلڪار ۽ عورتون شهيد ٿيون آهن. اهو ظاهر ڪري ٿو ته احتجاج کي پرامن رکڻ بجاءِ شعوري طور تي تشدد ڏانهن ڌڪيو پيو وڃي. حڪومت آپريشن لاءِ تيار آهي ۽ فوج سختي سان نڀائيندي، آزاد ڪشمير پاڪستان جي شهه رڳ آهي، ان کي ڪا به ٽين قوت آسانيءَ سان هضم نه ٿي ڪري سگهي.ان ئي پسمنظر ۾ مريم نواز کي ڊاڪٽر جاويد اقبال طرفان هڪ سماجي پيغام مليو ته اسڪولن ۾ ٻارن کي صفائيءَ جي ٽريننگ ڏني وڃي. مريم نواز فوراً تعليم واري وزير کي حڪم ڏنو ته اهو ڪم فوري طور لاڳو ڪيو وڃي.ٻئي طرف قمر زمان ڪائره جو مريم نواز لاءِ پيغام هو ته هوءَ جذباتي بيان نه ڏئي. هن چيو ته ماضي مان سبق سکڻ گهرجي. بلاول ڀٽو زرداري به نوجوان هجڻ باوجود اهڙا جذباتي بيان نٿو ڏئي. مريم نواز کي به اهڙي لهجي کان پاسو ڪرڻ گهرجي.ان کان پوءِ اسلام آباد ۾ مسلم ليگ (ن) ۽ پيپلز پارٽي جي اڳواڻن جي گڏجاڻي ٿي، جنهن ۾ طئه ٿيو ته ڳالهين سان معاملن کي اڳتي وڌائبو. پر رپورٽ موجب نواز شريف کي اها ڳالهه نه وڻي جو مسلم ليگ (ن) جي طرفان سخت بيان تي معافي گهري وئي. نواز شريف چيو ته معافي جي ضرورت نه هئي.مسلم ليگ (ن) ۽ پيپلز پارٽي پنهنجي پنهنجي سياسي جاءِ (اسپيس)حاصل ڪرڻ لاءِ هڪ ٻئي سان محاذ آرائي ڪري رهيون آهن. پيپلز پارٽي پنجاب ۾ ٻيهر جاءِ وٺڻ چاهي ٿي، جڏهن ته مسلم ليگ (ن) چاهي ٿي ته حقيقي اپوزيشن جو ڪردار پيپلز پارٽي ادا ڪري. اصل اپوزيشن تحريڪ انصاف آهي، پر اها پنهنجي نااهلي سبب قومي معاملن تي خاموش آهي. اهڙي صورتحال ۾ خالي جاءِ پيدا ٿي آهي جنهن کي پيپلز پارٽي ۽ مسلم ليگ (ن) ڀرڻ جي ڪوشش ڪري رهيا آهن.سڀ ڪجهه نظر ايندو ته ايندڙ ڏينهن ۾ ڪير ڪامياب ٿيندو، پر ايترو ضرور آهي ته ڪشمير جو مسئلو رڳو ڳالهين ۽ حڪمت عملي سان حل ٿي سگهي ٿو. ٽين قوت جي ڪوشش ڪامياب ٿيڻ ڏاڍو مشڪل آهي.
