سکر (ويب ڊيسڪ) وڏي وزير مراد علي شاهه چيو آهي ته سنڌ حڪومت ٻوڏ جي حوالي سان تياري مڪمل ڪري ورتي آهي.
صوبائي وزيرن سان گڏ پريس ڪانفرنس ڪندي مراد علي شاهه چيو ته بلاول ڀٽو زرداري گڊو ۽ سکر بيراج جو جائزو ورتو هو، هن وفاق کي چيو هو ته زرعي ايمرجنسي لڳايو، وزيراعظم جا ٿورائتا آهيون جو هن وفاقي ڪابينا جي اجلاس کانپوءِ زرعي ۽ موسمياتي ايمرجنسي لاڳو ڪئي.
هن چيو ته جلد کان جلد بينظير انڪم سپورٽ پروگرام ذريعي متاثرن جي مدد ڪئي وڃي، موسمياتي تبديلي سبب اسان ٻوڏن کي منهن ڏئي رهيا آهيون، وزيراعظم کي چوان ٿو ته گڏيل قومن کي رليف لاءِ فوري طور اپيل ڪئي وڃي.
سندس چوڻ هو ته گڊو بيراج تي پاڻي جي آمد 6 لک ڪيوسڪ کان وڌيڪ آهي، اندازو آهي ته ساڍا 6 کان 7 لک ڪيوسڪ جو وهڪرو سکر بيراج مان گذري سگهي ٿو، گڊو کان سکر تائين موجود بند جي مضبوطي لاءِ ڪم ڪيو پيو وڃي، اسان جي پهرين ترجيح ماڻهن کي بچائڻ آهي.
