ايپل پنهنجي سالياني ايپل ايونٽ 2025 دوران نئين الٽرا واچ 3 جو باقاعدي اعلان ڪري ڇڏيو، ان سان گڏ ڪمپني پنهنجو نئون فليگ شپ سمارٽ فون آئي فون 17 ۽ ٻيون شيون به پيش ڪيون.
ايپل واچ الٽرا 3 ڪمپني جي هيل تائين جي سڀ کان وڏي سمارٽ واچ آهي، جنهن ۾ جديد ترين اوليڊ ريٽينا ڊسپلي ۽ بهتر رُخ سان ڏسڻ جي صلاحيت شامل آهي. نئين واچ جي بيٽري 42 ڪلاڪ تائين هلندي، جيڪا ڪنهن به ايپل واچ جي سڀ کان ڊگهي بيٽري لائف آهي.
نئين واچ ۾ ايپل جو جديد ترين S10 چپ سيٽ لڳايل آهي، جيڪو اڳئين S9 چپ جي مقابلي ۾ وڌيڪ تيز ۽ اثرائتي ڪارڪردگي فراهم ڪري ٿو.
ايپل واچ الٽرا 3 ۾ پهريون ڀيرو هاءِ بلڊ پريشر جي نگراني ڪرڻ وارو فيچر به شامل ڪيو ويو آهي، اهو فيچر واهپيدار کي وقت تي اطلاع ۽ صحت جي امڪاني خطري کان بچاءَ لاءِ مشورو به ڏئي ٿو.
ايپل واچ الٽرا 3 ۾ نئون سيٽلائيٽ ٽيڪسٽنگ وارو فيچر به ڏنو ويو آهي، جيڪو ڏورانهن علائقن ۾، جتي موبائل نيٽ ورڪ موجود نه هوندو، اتي هنگامي پيغام موڪلڻ ۾ مدد ڪري ٿو.
ايپل واچ الٽرا 3 جي قيمت 799 ڊالر مقرر ڪئي وئي آهي، جڏهن ته اها واچ 19 سيپٽمبر 2025 کان واهپيدارن لاءِ موجود هوندي، في الحال اها واچ پري آرڊر لاءِ دستياب آهي.
