لاهور (م ڊ) پنجاب گروپ جي چيئرمين ميان عامر محمود چيو آهي ته نون صوبن جي قيام سان انصاف تائين رسائي ۾ سڌارو ايندو، آمدني وڌندي ۽ گورننس بهتر ٿيندي، پر پاڪستان ۾ لوڪل گورنمنٽ کي ڪڏهن به سنجيدگي سان نه ورتو ويو يونيورسٽي آف لاهور ۾ “ايپ سپ” تنظيم جي آگاهي سيمينار سان خطاب ڪندي ميان عامر محمود چيو ته پاڪستان جو تعليمي نظام سنگين بحرانن جو شڪار آهي، عالمي ادارا جهڙوڪ يونسيف حل تجويز ڪن ٿا پر پاڪستان جي حيثيت اڃا به انهن ملڪن کان مٿي ناهي جتي گهرو ويڙهه هلي رهي آهي۔ ملڪ ۾ 2 ڪروڙ 50 لک ٻار اسڪولن کان ٻاهر آهن، قانون جي بالادستي ۾ پاڪستان دنيا ۾ 120هين نمبر تي آهي۔هن چيو ته آمريڪا ۾ آبادي وڌڻ سان 13 رياستن مان 50 رياستون ٿي ويون، ڀارت ۾ 9 مان 28 صوبن تائين واڌ ٿي۔ پاڪستان ۾ به هر ڊويزن کي صوبو بڻايو وڃي: پنجاب ۾ 10، سنڌ ۾ 7 ۽ بلوچستان ۾ 8 صوبن جي گنجائش آهي۔ ملتان، بهاولپور، هزارا ۽ مهاجر آبادي نوان صوبن جو مطالبو ڪري رهيا آهن۔ڪجهه ماڻهن جا مفاد وڏن صوبن سان جڙيل آهن، تنهنڪري ملڪ اڳتي نٿو وڌي،ميان عامر محمود چيو ته عدالتن ۾ لکين ڪيس التوا هيٺ آهن، نظام اهڙو آهي جو ماڻهو سڄي زندگي عدالتن ۾ ڦاٿل رهن ٿا۔ جوڊيشري جو پرفارم نه ڪرڻ ڪنهن فرد جو نه پر سسٽم جو قصور آهي۔هن چيو ته جيڪڏهن سسٽم صحيح نه ڪيو ويو ته ملڪ جون معدنيات به رحمت بدران زحمت بڻجي وينديون۔ هن چيو ته دنيا ۾ ليڊرز مڊل ڪلاس مان نڪرندا آهن پر پاڪستان ۾ اشرافيه سڀ ڪجهه قابض آهي۔ سياسي، فوجي، سول سروسز ۽ ڪاروباري اشرافيه خوشحال آهي، پر مڊل ڪلاس انهن جو شڪار آهي.
