حيدرآباد (پ ر) عوامي تحريڪ جي مرڪزي صدر ايڊووڪيٽ وسند ٿري، مرڪزي سينيئر نائب صدر نور احمد ڪاتيار، مرڪزي اڳواڻ ڪاشف ملاح، پرهه سومرو ۽ ايڊووڪيٽ اياز ڪلوئي پنهنجي گڏيل پريس بيان ۾ چيو آهي ته انتظامي معاملن جو حل نون صوبن بدران 1940ع جي قرارداد تي عمل ڪرڻ ۾ آهي. 1940ع جي لاهور قرارداد پاڪستان جي آئين جو روح هجڻ گهرجي، پر بدقسمتي سان ان قرارداد کي آمرن ۽ نام نهاد جمهوري حڪمرانن ردي جي ٽوڪري ۾ اڇلائي ڇڏيو ۽ پاڪستان کي مظلوم قومن جو قيدخانو بڻايو ويو، هنن چيو ته اسٽيبلشمينٽ، قائداعظم جي جمهوري ۽ سيڪيولر ملڪ کي عالمي سامراجي طاقت جي مدد سان يرغمال بڻايو. قومن جي وسيلن تي قبضا ڪرڻ لاءِ ون يونٽ مڙهيو ويو. پاڪستان ۾ سدائين سڌي يا اڻ سڌيءَ ريت آمريت مسلط رهي، جنهن جو نتيجو 1971ع ۾ ملڪ ٽٽڻ جي صورت ۾ نڪتو. ملڪ ٽوڙيندڙ ڏوهارين کي سزا ڏيڻ بدران اقتدار ڏنو ويو ۽ بچيل ملڪ کي به تباهه ڪيو ويو. هاڻ وري وفاقي سرڪار نون صوبن جي مهم هلائي رهي آهي.
