ڪراچي (رپورٽر) سنڌ هاءِ ڪورٽ ۾ عدالتي عملي پاران سنڌ حڪومت خلاف داخل ڪيل توهين عدالت جي درخواست تي ٻڌڻي ٿي. ڪراچي جو ميئر بئريسٽر مرتضيٰ وهاب فنانس سيڪريٽري ۽ چيف سيڪريٽري سنڌ جي طرفان وڪيل طور عدالت ۾ پيش ٿيو. مرتضيٰ وهاب ايڊووڪيٽ عدالت ۾ چيو ته جن آفيسرن خلاف توهين عدالت جي ڪارروائي داخل ڪئي وئي هئي، انهن عدالتي حڪمن تي عمل ڪيو هو. آفيسرن سنڌ ڪابينا کي عدالتي الائونس بابت سمري موڪلي هئي. سنڌ ڪابينا عدالتي عملي کي عدالتي الائونس جي فراهمي جي به منظوري ڏني هئي. درخواستگذار جي وڪيل چيو ته سنڌ اسيمبلي ۾ وزيرن پاران عدالتي حڪمن خلاف ڪيل تقريرون ٻڌي توهان حيران ٿي ويندا. جيڪڏهن سنڌ اسيمبلي جو عدالتي الائونس بابت فيصلو قبول ڪيو وڃي ته اهي ماڻهو هر عدالتي فيصلي کي ڪالعدم قرار ڏيندا. عدالت پڇيو ته جيڪڏهن عدالتي الائونس جا پئسا سنڌ هاءِ ڪورٽ جي رجسٽرار جي اڪائونٽ ۾ آهن ته پوءِ ان کي ادا ڪرڻ ۾ ڪهڙو مسئلو آهي؟ جسٽس عدنان ڪريم ميمڻ پنهنجي ريمارڪس ۾ چيو ته عدالت فيصلو ڪندي ته آفيسرن خلاف توهين عدالت جي ڪارروائي ڪرڻي آهي يا نه. ڪيس ۾ تحريري حڪم جاري ڪيو ويندو. ايڊووڪيٽ جنرل سنڌ چيو ته هي هڪ پاليسي معاملو آهي ۽ اسان جو موقف ٻڌڻ گهرجي. عدالت چيو ته اسان اڄ توهين عدالت جي ڪارروائي نه ڪري رهيا آهيون. اهو توهين عدالت جو نوٽيس جاري ڪرڻ جو معاملو ناهي پر ان تي تحريري حڪم جاري ڪيو ويندو.
