گردن ۽ رت جي ماهرن خبردار ڪيو آهي ته ننڍي عمر جا ٻار لڳاتار گردن جي ناڪامي، ٿيليسيميا، رت جي خطرناڪ بيمارين ۽ بار بار ٿيندڙ انفيڪشنز جو شڪار ٿي رهيا آهن، جن جي پويان هڪ اهم ۽ خطرناڪ سبب غير صحت مند خوراڪ آهي. خاص طور تي چپس، فنگر فرائيز، دٻي وارا جوس ۽ اهڙيون تيار ٿيل شيون، جن جو روزانو استعمال هاڻي عام ٿي ويو آهي.
ماهرن جو چوڻ آهي ته اهي شيون ظاهر ۾ ذائقي واريون ضرور آهن، پر حقيقت ۾ ٻارن جي جسم کي اندر ئي اندر زهر ڏئي رهيون آهن. انهن خوراڪن ۾ استعمال ٿيندڙ تيزابيت، زهريلا ڪيميڪل، هٿرادو ذائقو، وڌيڪ کنڊ ۽ خراب چربيون ننڍڙي جسم جي عضون کي بگاڙي سگهن ٿيون، خاص ڪري گردا، جگر ۽ رت ٺاهڻ وارا عضوا.
والدين خاص طور تي مائرن کي خاص اپيل ڪئي وئي آهي ته هو پنهنجي ٻارن جي خوراڪ بابت انتها جي سنجيدگي ڏيکارين. روزمره جي خوراڪ مان چپس، فرائيز ۽ بازاري جوسز کي نيڪالي ڏني وڃي ۽ انهن جي جاءِ تي تازا ميوا، پڪل سبزيون، تازا جوس يا پاڻي کي ترجيح ڏني وڃي.
اهڙي تبديلي نه رڳو ٻارن جي هاڻوڪي صحتمند واڌ ويجهه لاءِ اهم آهي، پر سندن مستقبل کي به سنگين بيمارين کان محفوظ رکي سگهي ٿي. ياد رکو، معصوم زندگيون محفوظ رکڻ لاءِ والدين جي چونڊ سڀ کان اهم آهي.
