سکر (ويب ڊيسڪ) وزيراعظم يوٿ پروگرام ۽ لاهور قلندرز جي سهڪار سان سکر ۾ نوجوانن لاءِ ڪرڪيٽ جي ٻن ڏينهن واري ٽرائلز جو سلسلو شروع ڪيو ويو آهي. پهرئين ڏينهن سکر، خيرپور، گھوٽڪي، شڪارپور۽ ٻين ضلعن کان 15 کان 25 سال جي عمر وارن سوين نوجوانن ٽرائلز ۾ حصو ورتو، جڏهن ته ٻئي ڏينهن ڇوڪرين جا ٽرائلز منعقد ڪيا ويندا.
ان موقعي تي چيئرمين ڊسٽرڪٽ ڪائونسل سکر سيد حيدر شاهه، وزيراعظم يوٿ پروگرام جي ڪوآرڊينيٽر فهد شفيق ۽ لاهور قلندرز جي هيڊ ڪوچ رياض آفريدي ٽيلنٽ هنٽ پروگرام تحت جاري ٽرائلز بابت ميڊيا سان ڳالهه ٻولهه ڪئي، ڊپٽي ڪمشنر سکر ڊاڪٽر ايم بي راجا ڌاريجو به ساڻس گڏ هو.
چيئرمين ڊسٽرڪٽ ڪائونسل سکر سيد ڪميل حيدر شاهه چيو ته سکر ڊويزن جي نوجوانن کان ٽيلنٽ ٽرائلز وٺڻ لاءِ هڪ ڪيمپ قائم ڪئي وئي آهي.
هن چيو ته لاهور قلندرز ۽ وزيراعظم يوٿ پروگرام جي ٽيلنٽ هنٽ ٽيم هتي ٽيلنٽ ڳولڻ لاءِ آئي آهي جنهن لاءِ اسان ان جا شڪرگذار آهيون. نه رڳو سکر پر سڄي سنڌ ۾ اسان انهن سان مڪمل سهڪار ڪرڻ لاءِ تيار آهيون.
چيئرمين ڊسٽرڪٽ ڪائونسل سکر وڌيڪ چيو ته سنڌ جا ماڻهو سمجهن ٿا ته انهن کي اهڙا موقعا نٿا ملن، پر هاڻي سنڌ مان پڻ ٽيلنٽ سامهون ايندو. هن پڪ ڏني ته ٽيلنٽ هنٽ پروگرام ڪامياب ٿيندو ۽ ان لاءِ اسان جو مڪمل سهڪار رهندو.
وزيراعظم يوٿ پروگرام سنڌ جي ڪوآرڊينيٽر فهد شفيق صحافين سان ڳالهائيندي چيو ته سخت گرمي باوجود نوجوان ڪرڪيٽ لاءِ ٽرائلز ڏئي رهيا آهن، ڪميل حيدر شاهه سکر ۾ مڪمل سهڪار ڪيو آهي، جنهن لاءِ اسان ان جا شڪرگذار آهيون.
فهد شفيق جو چوڻ هو ته ان ۾ ڪو شڪ ناهي ته سنڌ حڪومت کان مڪمل مدد ملي رهي آهي. اسان چاهيون ٿا ته سنڌ جا ٻار به قومي ۽ عالمي سطح تي کيڏن.
هن چيو ته مستقبل ۾ سنڌ حڪومت، ڊسٽرڪٽ ڪائونسل سکر ۽ وزيراعظم يوٿ پروگرام گڏجي نوجوانن لاءِ پروگرام ترتيب ڏيندا. سنڌ جي هر شهر ۽ علائقي ۾ ٻارن کي سڀني راندين ۾ موقعا ڏنا ويندا.
فهد شفيق نوجوانن کي مشورو ڏيندي چيو ته وزيراعظم ڊجيٽل هب هڪ آن لائن پليٽ فارم آهي، جتي نوجوان پنهنجا موقعا ڳولي سگهن ٿا. پاڪستان جي ڪنهن به شهر ۾ نوجوانن کي ضرورت پئي، اسان اتي گڏجي موقعا فراهم ڪنداسين.
هڪ سوال جي جواب ۾ فهد شفيق جو چوڻ هو ته شاهنواز ڏاهاڻي جو فٽنس جو مسئلو آهي، کيس ڪڏهن به نظرانداز نه ڪيو ويو.
لاهور قلندرز جي هيڊ ڪوچ رياض آفريدي چيو ته لاهور قلندرز ۽ وزيراعظم يوٿ پروگرام جي ٽيلنٽ هنٽ مهم ڪاميابي سان جاري آهي. بلوچستان ۾ ٽرائلز وٺندي پنج ٽيمون ٺاهيون ويون، جيڪي بلوچستان ۾ ٽورنامنٽ ڪري رهيون آهن ۽ پوءِ هڪ گڏيل ٽيم ٺاهي ويندي.
هن وڌيڪ چيو ته اهڙي ريت سنڌ ۾ پڻ پنج ٽيمون ٺاهيون وينديون ۽ انهن مان بهترين رانديگرن کي چونڊيو ويندو.
رياض آفريدي چيو ته هتي تمام گهڻو ٽيلنٽ آهي ۽ هونهار نوجوانن کي اڳتي وڌڻ جا موقعا ضرور ملڻ گهرجن.
هن چيو ته هتي اسان کي 140 ڪلوميٽر في ڪلاڪ جي رفتار سان بولنگ ڪندڙ بالر مليا آهن، جڏهن ته سٺا بيٽر پڻ مليا آهن.
رياض آفريدي جو وڌيڪ چوڻ هو ته سڀاڻي هتي ڇوڪرين جا ٽرائلز به ٿيندا ۽ اسان چاهيون ٿا ته انهن کي پڻ مڪمل موقعو ملي.
