لاهور (ويب ڊيسڪ) مرڪزي چنڊ ڏسڻي ريسرچ ڪائونسل جي سيڪريٽري جنرل خالد اعجاز مفتي اڳڪٿي ڪئي آهي ته نئين هجري سال 1447 جي شروعات 27 جون کان ٿيندي ۽ عاشوري جو ڏينهن 6 جولاءِ تي هوندو.
پنهنجي بيان ۾ خالد اعجاز مفتي چيو ته نئون چنڊ اربع 25 جون تي پاڪستاني وقت موجب ٻيپهري کانپوءِ 3 لڳي 32 منٽن تي پيدا ٿيندو، 29 ذوالحج 26 جون تي سج لٿي وقت چنڊ جي جيڪا عمر گهٽ ۾ گهٽ 18 ڪلاڪن کان وڌيڪ هجڻ گهرجي، اها پاڪستان جي سڀني علائقن ۾ ساڍن 27 ڪلاڪن کان به وڌيڪ ٿي چڪي هوندي ۽ پاڪستان جي جنهن به حصي ۾ آسمان صاف هوندو ته چنڊ آساني سان نظر اچي ويندو.
هن چيو ته ان حساب سان پاڪستان ۾ پهرين محرم الحرام نئين هجري سال 1447 جي شروعات جمعي 27 جون کان ٿيندي ۽ عاشوري جو ڏينهن 10 محرم الحرام آچر 6 جولاءِ تي هوندو.
هوڏانهن مرڪزي چنڊ ڏسڻي ڪميٽي جو اجلاس 26 جون تي ڪوئيٽا ۾ طلب ڪيو ويو آهي.
