اسلام آباد (ويب ڊيسڪ) پوليو جي جاچ لاءِ سڄي ملڪ مان مئي ۾ گڏيل ڪيل 116 ماحولياتي نمونن مان 47 ۾ پوليو وائرس جي تصديق ٿي آهي.
پوليو روڪ پروگرام موجب 69 ماحولياتي نمونن ۾ پوليو وائرس جي تصديق نه ٿي، جڏهن ته 34 ضلعن جي ماحولياتي نمونن ۾ پوليو وائرس جي نشاندهي ٿي آهي.
سنڌ جي 14 ضلعن ۾ پوليو وائرس جي تصديق ٿي آهي، خيبر پختونخواهه جي 8، بلوچستان جي 6، پنجاب جي 4 ضلعن ۾ پوليو وائرس جي تصديق ٿي.
گلگت بلتستان جي هڪ ضلعي جو ماحولياتي نمونو هاڪاري آيو، جڏهن ته اسلام آباد جي ماحولياتي نموني ۾ به پوليو وائرس جي نشاندهي ٿي.
سڀني ماحولياتي نمونن ۾ جهنگلي پوليو وائرس ٽائپ ون جي نشاندهي ٿي آهي.
پوليو روڪ پروگرام چيو آهي ته سڄي ملڪ جي 47 ماحولياتي نمونن ۾ پوليو وائرس جي موجودگي ڳڻتيءَ جوڳي آهي، پوليو وائرس جي موجودگي ٻارن جي صحت لاءِ سنگين خطرو آهي، والدين ٻارن کي پوليو جا ڦڙا ضرور پيئارين.
