تل ابيب (ويب ڊيسڪ) اسرائيلي حڪومت فرانسيسي صدر ايمانويل ميڪرون تي يهودي رياست خلاف صليبي جنگ جاري رکڻ جو الزام مڙهي ڇڏيو.
. اسرائيلي پرڏيهي وزارت طرفان جاري ڪيل بيان ۾ چيو ويو آهي ته فرانسيسي صدر جي يهودي رياست خلاف صليبي جنگ جاري آهي، ميڪرون کي حقيقتن سان ڪائي دلچسپي نه آهي.
اسرائيلي پرڏيهي کاتي دعويٰ ڪئي آهي ته غزا ۾ انساني امداد جي فراهمي جي ناڪابندي نه آهي ۽ امداد پهچائڻ لاءِ اسرائيل سهولت فراهم ڪري رهيو آهي.
اسرائيل جو چوڻ آهي ته حماس تي دٻاءُ وجهڻ بدران ميڪرون کين فلسطيني رياست جو انعام ڏيڻ چاهي ٿو ۽ اسرائيل تي پابنديون لڳائڻ جي ڪوشش ڪري رهيو آهي.
ٻئي پاسي اسرائيلي بچاءُ واري وزير چيو آهي ته اسان فلسطين جي اولهندي ڪناري يهودي اسرائيلي رياست قائم ڪنداسين، صدر ميڪرون ۽ سندس ساٿين لاءِ اسان جو پيغام واضح آهي ته هو فلسطين کي ڪاغذ جي ٽڪري تي تسليم ڪندا ۽ اسان هتي زمين تي اسرائيلي رياست قائم ڪنداسين.
ياد رهي ته گذريل ڏينهن فرانسيسي صدر ميڪرون چيو هو ته هو فلسطيني رياست کي تسليم ڪرڻ لاءِ حمايت ڪري سگهي ٿو ۽ غزا ۾ انساني امدادي صورتحال بهتر نه ٿي ته فرانس اسرائيلي آبادڪارن تي پابنديون مڙهي سگهي ٿو.
