ممبئي (ويب ڊيسڪ) بالي ووڊ جي موسٽ اويٽڊ فلم ”ڪرش 4“ جو ڪجهه ڏينهن اڳ باضابطا اعلان ڪيو ويو، جنهن ۾ مداحن کي ٻڌايو ويو ته هن ڀيري اداڪار ريٿڪ روشن نه رڳو فلم ۾ مک ڪردار نڀائيندو پر هن فلم لاءِ هدايتڪاري جي ذميواري به سنڀالي آهي.
جيئن ئي فلم ساز راڪيش روشن ”ڪرش 4“ جو اعلان ڪيو ته سوشل ميڊيا واهپيدار تجسس ۾ نظر آيا ته فلم ڪرش ۽ ڪرش 3 ۾ مک ڪردار نڀائيندڙ اداڪارا پريانڪا چوپڙا ان ۾ نظر ايندي؟
مداحن جي ان تجسس کي ختم ڪندي ڀارتي ميڊيا هڪ رپورٽ ۾ دعويٰ ڪئي آهي ته پريانڪا چوپڙا جي ”ڪرش 4“ سان بالي ووڊ فلم انڊسٽري ۾ ڪيترن ئي سالن کانپوءِ واپسي ٿيندي.
رپورٽ موجب پريانڪا چوپڙا فلم ۾ مک ڪردار ادا ڪرڻ لاءِ صحيحون ڪري ڇڏيون آهن.
ڀارتي ميڊيا تي ريٿڪ روشن ۽ پريانڪا چوپڙا جي ٻيهر اسڪرين تي گڏجڻ جي خبر وائرل ٿيڻ تي مداحن خوشي جو اظهار ڪندي ٻنهي اداڪارن جي ڪيمسٽري کي ڪرش فرنچائز جي ڪاميابي جي ضمانت قرار ڏنو.
