لاهور (بيورو) پيپلز پارٽي پنجاب جي اڳواڻ چوڌري منظور چيو ته پاڻي جي ورڇ هڪ حساس مسئلو آهي، پاڻي تي پاڪستان ۽ ڀارت جي وچ ۾ هڪ مسئلو رهيو آهي. وزيراعليٰ پنجاب ٻڌائي ته توهان ڪهڙي ڪينال کي بند ڪري نئين ڪينال کي پاڻي ڏيندا؟ وزيراعليٰ پنجاب سيالڪوٽ کي ڪٽيندي؟ يا شيخوپورا کي ڪٽيندي؟ پريس ڪانفرنس ۾ چيو ته سنڌ ۾ نون ڪينالن خلاف ڪيترائي احتجاج ٿي رهيا آهن. هن چيو ته سسٽم ۾ پاڻي ناهي، جنهن صوبي ۾ مسئلو آهي اتان جي ماڻهن سان ڳالهائڻ گهرجي، توهان نان ايشو بيهاري ڇڏيو، ٻن صوبن ۾ صورتحال اڳ ئي خراب آهي، ۽ هاڻي اهي ٽئين ۾ به اهو ڪرڻ چاهين ٿا. هي منصوبو بلڪل به ممڪن ناهي. هن چيو ته پيپلز پارٽي ائين ٿيڻ نه ڏيندي، اسان هر هنڌ هارين سان گڏ بيٺا هونداسين. وزيراعظم کان پڇان ٿو ته هو سنڌ ۽ ٻين صوبن جي مطالبي جي باوجود گڏيل مفادن واري ڪائونسل جو اجلاس ڇو نه ٿو گهرائي؟ هن چيو ته توهان ڪارپوريٽ فارمنگ جي نالي تي پنجاب جي ننڍن آبادگارن جو قتل ڪري رهيا آهيو، ماهر به حيران آهن ته ڇا ٿي رهيو آهي، هر کوٽيل ڪينال جو چوڏهن سيڪڙو ضايع ٿي ويندو آهي، جڏهن ته چولستان ڪينال جو چاليهه سيڪڙو ضايع ٿيڻ جو خطرو آهي. چوڌري منظور چيو ته هر صوبي کي حق آهي ته هو پنهنجي حصي جو پاڻي جتي چاهي ورهائي. سسٽم مان 30 ملين ايڪڙ فوٽ پاڻي غائب ٿي چڪو آهي ۽ هاڻي اهو وڌيڪ گهٽجي رهيو آهي. پنجاب حڪومت چئي رهي آهي ته اسان 14 ڊي بحال ڪري رهيا آهيون، پاڻي جي کوٽ کي سڀني صوبن ۾ ورهايو وڃي. هن چيو ته ٻڌو آهي ته وزيراعظم حاتم طائي جي قبر کي لتون هڻي رهيو آهي، وزيراعظم 65 رپيا يونٽ بجلي پيدا ڪري 6 رپيا سستي ڪري رهيو آهي. هاري تباهه ٿيندو ته ملڪ تباهه ٿيندو، اهو سمجهڻ جي ضرورت آهي، ڪئنال قومي منصوبو نه تماشو لڳايو پيو وڃي.
