بدين (رپورٽ :رازق ڏنو کوسو)لاڙ ميوزيم بدين جي اڳيان ڪتابن جي اسٽال تي اي سي بدين چڙھائي ڪري اسٽال جي شاميانن کي ڇري سان ڪٽي ڪتابن کي ٿڏا ھڻي اسٽال پٽي ڇڏيو واقعي جو اطلاع ملڻ سان بدين جا سياسي سماجي اڳواڻ ڪارڪن ۽ شھري وڏي تعداد ۾ لاڙ ميوزيم بدين پھچي ويا ان موقعي تي عوامي شاعر ڊاڪٽر آڪاش انصاري بدين شھري اتحاد جي ڪنوينر خليفه طارق عزيز ميمڻ، پروفيسر شفيع دل، جبار حبيباڻي،پروفيسر طفيل احمد چانڊيو، سانول گوپانگ، جبار گراڻو کانسواءِ بدين بار جي وڪيلن ۽ شھرين اي سي بدين راجيش ڪمار جي خلاف احتجاجي مظاهرو ڪيو ھن موقعي تي ڊاڪٽر آڪاش انصاري چيو ته بدين ۾ ھر ھنڌ منشيات وڪرو ڪئي پئي حد دخلين جو آزار آھي انتظاميا کي اھو نظر نٿو اچي ھنن کي ڪتابن جو اسٽال خراب لڳي ٿو جنھن کي ڊاھي پٽ ڪري علم دشمني جو ثبوت ڏنو ويو آھي ھن چيو ته اسان لطيف جي رسالن ۽ ٻين علمي ادبي ڪتابن جي توھين ڪري پٽ تي اڇلائڻ کي علم دشمني قرار ڏيندي ان عمل جي سخت مذمت ڪريون ٿا ھن موقعي تي ڊي سي بدين ياسر ڀٽي واقعي جو نوٽيس وٺندي احتجاج تي ويٺل ڊاڪٽر آڪاش انصاري سان واقعي تي افسوس جو اظھار ڪندي معذرت ڪئي ۽ اي سي بدين راجيش ڪمار کي سرزمين تي وڃي معافي وٺڻ جو حڪم ڏنو جنھن تي اي سي بدين راجيش ڪمار لاڙ ميوزيم پھچي اسٽال لڳائيندڙ نظير ميمڻ ۽ بدين جي شعور کان معافي ورتي
