ڪراچي (پ ر) جيئي سنڌ محاذ چيئرمين رياض علي چانڊيي چيو آھي ته ڪارپورٽ فارمنگ جي نالي تي سنڌ جي زمين تي ولار ڌرتي ڌڻين کي معاشي تباهي ۾ مبتلا ڪرڻ جي رٿا آھي، ترقياتي منصوبن ۽ سُٺن نعرن جي آڙ ۾ اسان جي زندگي جو آخري ذريعو زمين کسڻ قابل مذمت آھي سنڌ جا ماڻهو ڏسن تي پيپلزپارٽي مرڪز ۾ اتحادي سرڪار ۾ ويهي ڌرتي ڌڻين جي تباهي جون سڀ رٿائون آڻي پئي، سنڌ جا وسيلا، ڪوئلو، گئس، تيل، سمنڊ، ناڻو لٽيو ويو آھي سنڌين جي ترقي، ڀلائي ۽ بهتر زندگي تي خرچ نه پيو ٿئي، اهڙي خيالن جو اظھار محاذ سربراهه رياض علي چانڊيو ڪياماڙي ۽ ڪورنگي ضلعي جي تنظيمي اجلاس کي خطاب ڪندي ڪيو هن وڌيڪ چيو ته سنڌ جي ماڻھن جو پيداواري وسيلو درياه سنڌ سان وابسته آھي زمينن سان وابسته آھي ڪئنال جبر جي بنياد تي ڪڍيا پيا وڃن زمين ڌرتي ڌڻين جي پيرن هيٺان جبر جي بنياد تي ڪڍي وڃي ٿي مطالبو ٿا ڪريون ته ڪارپورٽ فارمنگ جي نالي تي سنڌين کي پنهنجي زمين تان بيدخل ڪرڻ واريون رٿائون ختم ڪيون وڃن سنڌ جي ماڻھن کي عرض ۽ اپيل آھي ته درياه ۽ زمينون بچائڻ واري جدوجهد ۾ ٻاهر نڪرن ۽ اسان جو ساٿ ڏين.
