ڀارتي ٽيم سڊني ٽيسٽ کان اڳ هڪ غير معمولي قدم کنيو، جتي ٽيم جي ڪپتان جي بدران هيڊ ڪوچ گوتم گمڀير پري ميچ پريس ڪانفرنس ڪئي، اِهو فيصلو نه رڳو غير روايتي هو پر ان ڪيترن ئي سوالن کي جنم ڏنو.
روهت شرما جي شموليت شڪي
پريس ڪانفرنس دوران، صحافين ڀارتي ڪپتان روهت شرما جي شرڪت بابت سوال ڪيو، گوتم گمڀير ان معاملي تي ڪو به حتمي جواب ڏيڻ کان انڪار ڪندي چيو ”اسان جي ڳالهه ٻولهه جو مرڪز رڳو اهو رهيو ته اسان ايندڙ ميچ ڪيئن کٽي سگهون ٿا“ هيڊ ڪوچ اِهو بيان روهت شرما جي فٽنس ۽ ممڪن شموليت کي شڪي بڻائي ٿو.
ويرات ڪوھلي ۽ ٽيم جي منصوبا بندي
ويرات ڪوھلي، جيڪو هميشه ڀارتي ٽيم جي حڪمت عملي جو هڪ اهم حصو رهيو آهي، هن ڀيري به ٽيم جي منصوبا بندي ۾ اڳيان آهي، گمڀير موجب، ڊريسنگ روم ۾ سموري ڳالهه ٻولهه جو مققصد اِهو هو ته ٽيم بهترين ڪارڪردگي ڪيئن ڏيکاري سگهي ٿي.
ايمانداري ۽ ڪارڪردگي جو تعلق
گوتم گمڀير پنهنجي پريس ڪانفرنس دوران ايمانداري کي ڪارڪردگي لاءِ هڪ بنيادي عنصر قرار ڏنو، هن چيو”جيڪڏهن توهان ڪجهه خاص ڪرڻ چاهيو ٿا ته توهان کي ايماندار ٿيڻ گهرجي، اِها ايمانداري توهان جي ڪارڪردگي ۾ نظر اچي گهرجي.“
آڪاش ديپ جي غير موجودگي
ڀارتي ٽيم جو فاسٽ بالر آڪاش ديپ چيلهه جي تڪليف سبب سڊني ٽيسٽ نه کيڏي سگهندو، اِهو ڀارتي ٽيم لاءِ هڪ وڏو نقصان آهي ڇاڪاڻ ته آڪاش ديپ جي موجودگي ٽيم جي بالنگ لائين اپ کي وڌيڪ مضبوط بڻائي ٿي.
سڊني ٽيسٽ لاءِ ٽيم جو اعلان نه ٿي سگهيو
گوتم گمڀير تصديق ڪئي ته سڊني ٽيسٽ لاءِ حتمي ٽيم جو اعلان ميچ کان هڪ ڏينهن اڳ جمعي تي ڪيو ويندو. ان فيصلي مان ظاهر ٿئي ٿو ته ٽيم مئنيجمينٽ سڀني امڪانن جو جائزو وٺيندي تڙ تڪڙ ۾ فيصلو ڪرڻ کان پاسو ڪري رهي آهي.
سڊني ۾ آخري مقابلو ڀارت لاءِ بقا جو چئلينج
سڊني ٽيسٽ نه رڳو ڀارتي ٽيم لاءِ هڪ چئلينج هوندو پر اِهو ڏسڻ جو موقعو به فراهم ڪندي ته ٽيم ڪيئن مشڪل حالتن ۾ پنهنجي حڪمت عملي کي عملي جامو پهرائي ٿي.
گوتم گمڀير جي هاڪاري روين ۽ ٽيم جي عزم مان اهو واضح ٿئي ٿو ته ڀارتي ٽيم کٽڻ لاءِ مڪمل تياري ڪري رهي آهي.
