جده ( ويب ڊيسڪ) انڊين پريميئر ليگ ( آءِ پي ايل ) 2025ع جي سيزن لاءِ رانديگرن جي ٻولي جي ٻن ڏينهن واري تقريب سعودي عرب جي شهر جده ۾ ٿي گذري، جتي فرنچائزز پنهنجين ٽيمن ۾ شامل ڪرڻ لاءِ بهترين رانديگرن کي ڪروڙين رپين ۾ خريد ڪيو.
آءِ پي ايل جو 18 هون ايڊيشن ايندڙ سال مارچ ۽ مئي جي وچ ڌاران کيڏيو ويندو، ٽورنامينٽ لاءِ ڏهن فرنچائزز دنيا جا بهترين رانديگر پنهنجي ٽيم ۾ شامل ڪرڻ لاءِ ڪروڙين رپيا خرچ ڪري ڇڏيا.
آچر جي ڏينهن رشڀ پنت آءِ پي ايل جي نيلامي ۾ نئين تاريخ لکندي مهانگي ترين رانديگر جو اعزاز پنهنجي نالي ڪري ورتو.
پنت لاءِ ادا ڪئي ويندڙ اها رقم پاڪستاني ڪرنسي ۾ تقريبن 88 ڪروڙ 81 لک رپين کان وڌيڪ ٿئي ٿي.
آءِ پي ايل جو ٻيو مهانگو ترين رانديگر ڀارتي ڪرڪيٽر شرياس ائير رهيو جنهن کي پنجاب ڪنگز 26 ڪروڙ 75 لک ڀارتي رپين ۾ خريد ڪيو.
ان کانسواءِ آءِ پي ايل 2025 جو ٽيون مهانگو ترين رانديگر ڀارت جو ئي ونڪٽيش ائير رهيو جنهن کي ڪولڪتا نائيٽ رائيڊرز 23 ڪروڙ 75 لک ڀارتي رپين ۾ پنهنجي ٽيم شامل ڪيو.
ڀارتي فاسٽ بالر ارشديد ۽ اسپنر يوزويندر چاهل تي 18، 18 ڪروڙ ڀارتي رپيا خرچ ڪري پنجاب ڪنگز پنهنجي اسڪواڊ جو حصو بڻايو.
فرنچائزز جتي رانديگرن تي ڪروڙين رپيا خرچ ڪيا اتي ڪرڪيٽ جي دنيا جا ڪجهه اهڙا نالا به شامل آهن جن کي آءِ پي ايل جي ڪنهن به ٽيم خريدڻ ۾ دلچسپي نه ڏيکاري.
اُهي وڏا نالا جن کي آءِ پي ايل 2025 جي ڪنهن به ٽيم ۾ جاءِ نه ملي
اڳوڻي آسٽريلوي اوپنر ڊيوڊ وارنر، اسٽيو سمٿ، نيوزيلينڊ جي ڪين وليمسن، ڏکڻ آفريڪا جي فاف ڊوپليسي، افغانستان جي مجيب الرحمان، بنگلاديش جي مستفيض الرحمان، نيوزيلينڊ جي ڊيرل مچل ۽ گلين فلپس کي ڪنهن ٽيم خريد ناهي ڪيو.
ان کانسواءِ ڀارت جي اجنڪيا راهاني، پرٿوي شا، ويسٽ انڊيز جي شاءِ هوپ، آسٽريليا جي وڪيٽ ڪيپر ايلڪس ڪيري، انگلينڊ جي تجربيڪار اسپنر عادل رشيد، آل رائونڊر معين علي، جوني بئريسٽو، زمبابوي جي سڪندر رضا کي به ڪنهن فرنچائز خريدڻ ۾ دلچسپي ناهي ڏيکاري.
