ممبئي (ويب ڊيسڪ ) بالي ووڊ جي مشهور مزاحيه سيريز ” هائوس فل “ جي پنجين فلم جون تياريون زور شور سان جاري آهن، فلم ۾ مرڪزي ڪردار ادا ڪندڙ اڪشي ڪمار هڪ ڀيرو ٻيهر پنهنجي ڪاميڊي سان پرستارن جي چهري تي مرڪون وکيرڻ وارو آهي.
فلم ۾ اڪشي ڪمار جو ڪردار هڪ انوکي خاصيت رکندڙ آهي جنهن جا تفصيل في الحال ڳجها رکيا ويا آهن.
ساجد ناڊياڊوالا جي بئنر هيٺ ٺهندڙ فلم ۾ پهريون ڀيرو عورتن جي مرڪزي ڪردارن جو انگ به مرد اداڪارن جي برابر هوندو.
فلم ۾ جيڪولين فرنانڊس، نرگس فخري، سونم باجوا، چترانگدا سنگهه ۽ سونداريا شرما شامل آهن ساڻن گڏ مرد اداڪارن ۾ رتيش ديشمُک، اڀيشيڪ بچن، سنجي دت، فردين خان، نانا پاٽيڪر، چنڪي پانڊي، جيڪي شروف ۽ ڊينو موريا شامل آهن.
هائوس فل فائيو جي شوٽنگ 15 سپٽيمبر کان لنڊن ۾ شروع ٿيندي، جيڪا بنا ڪنهن وقفي جي 45 ڏينهن تائين جاري رهندي.
ميڊيا رپورٽس موجب، فلم جا ڪجهه اهم منظر لنڊن ۾ فلمايا ويندا جنهن کانپوءِ ڪهاڻي هڪ ڪروز تي پهچندي جتي مزاح ۽ مونجهارو عروج تي هوندو.
ترن منسکاڻي فلم جي هدايتڪاري فرض انجام ڏيندو، سپر ڪاميڊي فلم ايندڙ سال سموري دنيا جي سئنما گهرن ۾ رليز ڪئي ويندي.
