اڳوڻي ڀارتي آل رائونڊر يوراج سنگهه جي والد يوگراج سنگهه مهيندر سنگهه ڌوني کانپوءِ هاڻي ڪپل ديو کي به ڇتي تنقيد جو نشانو بڻايو آهي.
پنهنجي تڪراري تبصرن سبب اڄڪلهه ڀارتي ميڊيا تي يوگراج سنگهه ڇانيل آهي جنهن 1983ع ۾ ڀارت جي عالمي ڪپ فاتح ڪپتان ڪپل ديو کي ڌمڪي ڏيندي چيو ته ”مان توکي اهڙي مقام تي آڻيندس جو دُنيا توکي ٿڪون هڻندي.“
سوشل ميڊيا تي اڄڪلهه اڳوڻي ڪرڪيٽر يوگراج سنگهه جي هڪ وڊيو وائرل ٿي رهي آهي جنهن ۾ هو ڪپل ديو تي تنقيد سان گڏ کيس ڌمڪي ڏئي رهيو آهي.
يوگراج سنگهه الزام مڙهيو ته سندس ڀارتي ٽيم مان نيڪالي ۽ ڪيرئير ختم ڪرڻ پٺيان اڳوڻي ڪپتان ڪپل ديو جو هٿ هو.
سندس چوڻ هو ته هن پنهنجي پٽ ( يوراج سنگهه ) جي ڪيريئر کي ڪامياب بڻائڻ لاءِ سخت محنت ڪئي ته جيئن دنيا کان ڪپل ديو وسري وڃي.
وائرل وڊيو ۾ هن چيو ته ايم ايس ڌوني کي به ڪڏهن معاف نه ڪندس، اسان جي دور جي عظيم ترين ڪپتان ڪپل ديو کي مون چيو هو ته مان توکي اهڙي هنڌ پهڄائندس جتي دنيا توکي ٿڪون هڻندي.
وڊيو ۾ هن وڌيڪ چيو ته اڄ يوراج سنگهه وٽ 13 ٽرافيون آهن ۽ تون وٽ صرف هڪ ئي آهي، بحث اتي ئي ختم ٿئي ٿو.
ياد رهي ته يوگراج سنگهه ۽ ڪپل ديو جا لاڳاپا 1981 کان خراب آهن، يوگران سنگهه ڀارت طرفان هڪ ٽيسٽ 6 هڪ ڏينهن واريون ميچون پڻ کيڏي چڪو آهي.
