ناڻي واري وزارت نئين حڪومت لاءِ روڊ ميپ واضح ڪري ڇڏيو

اسلام آباد (ويب ڊيسڪ) ناڻي واري وزارت ماهوار اڪنامڪ اپ ڊيٽ آئوٽ لُڪ رپورٽ جاري ڪندي نئين حڪومت لاءِ روڊ ميپ واضح ڪري ڇڏيو.
ناڻي واري وزارت جي رپورٽ ۾ آءِ ايم ايف سان آخري اقتصادي جائزو مڪمل ڪرڻ تي زور ۽ آءِ ايم ايف سان جلد نئين قرض پروگرام لاءِ معاهدو اڻٽر قرار ڏنو ويو آهي.
رپورٽ ۾ ٻڌايو ويو ته سخت ۽ غير مقبول فيصلن سان معيشت بحالي جي رستي تي هلي پئي، نئين حڪومت ايف بي آر جي نئين سر جوڙجڪ لاءِ ضروري سڌارا ڪري.
رپورٽ ۾ پي آءِ اي سوڌو خساري ۾ هلندڙ ادارن کي خانگائڻ به لازمي قرار ڏنو ويو آهي ۽ چيو ويو آهي ته ڏکين سڌارن لاءِ آءِ ايم ايف سان ميڊيم ٽرم سهولتون وٺڻيون پونديون، حڪومت ملڪيتي ادارن ۾ گورنس ۽ مالي ڪارڪردگي بهتر بڻائڻي پوندي.
رپورٽ ۾ ٻڌايو ويو اهي ته نگران حڪومت آءِ ايم ايف سان معاهدي تحت حدف پورا ڪيا، هلندڙ مهيني مهانگائي 25.5 سيڪڙو تائين رهندي ۽ ايندڙ مهيني 24.5 سيڪڙو تائين رهندي.
رپورٽ ۾ چيو ويو اهي ته جولاءِ کان ڊسمبر تائين 1500 ارب روپيا پرائمري سرپلس رهيو، آءِ ايم ايف جي 0.5 سيڪڙو حد جي ڀيٽ ۾ پرائمري سرپلس 1.5 سيڪڙو رهيو.
رپورٽ ۾ ٻڌايو ويو آهي ته پهرين 7 مهينن ۾ برآمدون 9.3 سيڪڙو اضافي سان 18 ارب ڊالر رهيون، جولاءِ کان ڊسمبر تائين ايف بي آر جي ريونيو ۾ 29.8 سيڪڙو اضافو ٿيو ۽ 5149 ارب اوڳاڙي ٿي جڏهن ته نان ٽيڪس ريونيو ۾ 116.5 سيڪڙو واڌ ٿي.
رپورٽ موجب مالي سال 2023ع ۾ 7 مهينا ناڻي جي ذخيرن ۾ 50 ڪروڙ ڊالرز جي گھٽتائي ٿي، ستن مهينن ۾ 15 ارب 80 ڪروڙ ڊالرز ناڻو مليو، گذريل مالي سال انهيءَ عرصي ۾ 16 ارب 30 ڪروڙ ڊالرز ناڻي جا ذخيرا هئا.
مالي سال 2023ع جي ستن مهينن ۾ برآمدن ۾ 9.3 سيڪڙو واڌ رڪارڊ ٿي جنهن کان پوءِ برآمدون 16.4 ارب ڊالرز کان وڌيڪ 18 ارب ڊالر تائين پهچي ويون، پر درآمدن ۾ جولاءِ کان جنوري تائين 11.1 سيڪڙو گھٽتائي رڪارڊ ڪئي وئي جنهن کان پوءِ درآمدون 33.5 ارب ڊالر کان گھٽجي 29.8 ارب ڊالرز تائين رهيون.
رپورٽ موجب ڪرنٽ اڪائونٽ خساري ۾ 7 مهينن ۾ 71.2 سيڪڙو گھٽتائي ٿي، سڌي ريت پرڏيهي سيڙپڪاري ۾ 7 مهينن ۾ 21.4 سيڪڙو گھٽتائي ٿي، هلندڙ مالي سان جولاءِ کان جنوري تائين مالياتي خساري ۾ 43 سيڪڙو واڌ رڪارڊ ڪئي وئي.
رپورٽ موجب مالي سال 2023ع ۾ پرائمري بيلنس ۾ 103.6 سيڪڙو واڌ ٿي.