اسلام آباد(عوامي آواز نيوز) آمريڪي ٿنڪ ٽينڪ پنهنجي چونڊ رپورٽن ۾ پاڪستان ۾ 8 فيبروري تي ٿيندڙ پارلياماني چونڊن کان اڳ ملڪ جي سياسي منظر نامي کي تمام پيچيده قرار ڏنو آهي.ٿنڪ ٽينڪ جو چوڻ آهي ته سياسي جبر، ويڙهاڪ ڌمڪيون ۽ فوجي اثر جمهوري عمل کي خراب ڪري رهيا آهن، چونڊن جي شفافيت ۽ پاڪستان جي جمهوري مستقبل تي ان جي امڪاني اثرن بابت سوال اٿي ويا آهن.نواز شريف خلاف ڪيسن ۾ قانوني تعطل سان اڳوڻي وزيراعظم جي باري ۾ فوج جي مبينا جانبداري اليڪشن هيراڦيري جي شڪ شبهن کي جنم ڏئي ٿي،جنهن سان ايندڙ چونڊن جي شفافيت بابت خدشا وڌيڪ وڌي ويا آهن.آمريڪا سميت عالمي برادري ان طرح جي اڳڀرائي تي گهري نظر رکي ٿي، جڏهن ته اليڪشن عمل جي شفافيت تي سواليه نشان لڳل آهن.نيويارڪ ۾ قائم هيومن رائيٽس واچ (HRW) هڪ ٻي خوفناڪ صورتحال ڏانهن اشارو ڪندي چيو آهي ته حڪومتي دٻاءُ ۽ ميڊيا تي حملن صحافين ۽ سول سوسائٽي جي تنظيمن ۾ خوف جي فضا پيدا ڪئي آهي، جنهن سبب ڪيترائي ماڻهو سيلف سينسر شپ جو رستو اختيار ڪرڻ تي مجبور آهن.
نوٽ: هيءَ خبر روزاني عوامي آواز اڱارو 06 فيبروري 2024ع تي شايع ٿي
